Librat e Arlindës

Librat e mi të 2020-ës

Librat e mi të 2020-ës

Jemi të gjithë duke pritur, si jo shpesh në të vërtetë, që edhe këto ditë të fundit të kësaj 2020-te të pagjasë të kalojnë vrikthi. Në fakt ne shqiptarët mezi prisnim që të na ikte edhe 2019-a, një vit fatkeq që na tronditi zemrat e trupat edhe fizikisht nën goditjet e tërmeteve që morën jetë shqiptarësh e shkatërruan mundin e pronën e shumë të tjerëve. Sikur të prisnim që me magji të ndryshonte gjithçka, nga sot nesër. E në fakt secili i ka përjetuar në mënyrën e vet këto çaste tepër të vështira që s’mbarojnë e që të gjitha së bashku përbënë një tjetër vit të jetës së gjithsecilit. E në fakt mua personalisht librat ma kanë mbushur boshllëkun e kohës që s’kalon, po ashtu janë po librat që të mësojnë se kjo që po kalojmë nuk ka ndodhur veç njëherë në histori, njerëzimi ka kaluar e parë edhe më keq, duket si një melhem diturie që të mos të na duket se po jetojmë fundin e botës. Gjithsesi, në këtë fundvit, me shpresën e madhe që një dritë e furishme po shfaqet në fund të tunelit, më duket me vend të bëj një përmbledhje të 10 librave të mi të 2020-ës.

Librat e mi të 2020-ës

1. Vincent nga Barbara Stok, është një nga novelat grafike më të bukura që kam parë e që flet për jetën e Van Gogh-ut në Arlë, me ilustrime e tekste të mrekullueshme që përbën dhe një objekt shumë të bukur nga pikëpamja vizive. Jam shumë krenare për këtë vepër të cilën e kam përkthyer vetë gjatë ditëve të mbylljes dhe që më ka dhënë shumë mësime jete e kënaqësi të pafundme.

Librat e mi të 2020-ës

2. Fate dhe shtrëngata nga Lauren Groff, një libër për dashurinë, martesën, sekretin, të theënat e të pathënat, në penën e një shkrimtareje të madhe plot imagjinatë dhe mprehtësi të habitshme. Një shkrim i hatashëm në dy pjesë brenda një libri, ku duket sikur gjallon me të vërtetë jeta e dy njerëzve që sa njihen mes tyre po aq edhe të panjohur janë. Një nga librat më të bukur që kam lexuar në jetë.

Librat e mi të 2020-ës

3. Fluturimi i fundit nga shkrimtarja e njohur Brunilda Zllami, e cila merr në vëmendje jetën e një gruaje, të përndjekur nga një fat i zymtë, në luftë për jetën dhe pranimin e saj ashtu siç ajo të vjen. Si ngaherë Brunilda arrin të shkruajë një libër rrembyes dhe plot narracion që mahnit lexuesin e saj besnik që e ndjek në çdo hap të karrierës së saj të çimentuar tashmë.

Librat e mi të 2020-ës

4. Pertej dimrit nga Isabel Allende, shkrimtarja jonë ekskluzive erdhi me një libër shumë bashkëkohës, me aktualitetin e ditëve që jetojme. Ngjarjet zhvillohen në SHBA, por që personazhet medoemos do të lidhen me Kilin, apo me rrënjët latinoamerikane, e pashmangshme në librat e Allende-s. Ky është një libër që trajton plagët e emigrimit, antitrampizmin, dashurinë e vuajtjen, por edhe shpresën që vjen pas saj. Isabel Allende këtë vit përmbylli edhe trilogjinë për femijë e të rinj që fillon me Qyteti i shtazëve, vijon me Mbretëria e dragoit të artë dhe përfundon me Pylli i pigmejve.

Librat e mi të 2020-ës

5. Pasion i thjeshtë i një shkrimtareje të madhe franceze si Annie Ernaux, një libërth i vogël, por tejet intens. Është një grua në qendër e cila ka rënë pre e një pasioni trallisës, e gjithë jeta e saj vihet në funksion të këtij pasioni që edhe pse i thjeshtë siç thotë shkrimtarja, ka aftësinë të bllokojë mendjen, kohën e gjithë qenien tënde me një pushtet demoniac. Thuajse i tërë libri rrëfen pikërisht këtë ndjesi që zgjat aq kohë sa frymon pasioni.

Librat e mi të 2020-ës

6. Letërsia suedeze më ka tërhequr përherë shumë për ngjarjet me karakter thriller që trajton po dhe inteligjencën e hollë me të cilën shkruhen romanet. Burri që vëzhgonte gratë, i dyti pas Burri që nuk ishte vrasës, i shkruar nga dyshja suedeze Hjorth&Rosenfeldt. Edhe ky është një roman joshës skandinav nga ata që s’të lëshojne nga faqja e parë në të fundit. Sebastian Bergmani eshte psikiatri profilizues që i lidh të dy librat dhe përmes përfigurimit të vrasësve i jep përgjigje edhe pyetjeve personale që e torturojnë përgjate gjithë jetës së vet. E bukur në këta libra është pikëpamja se askush nuk lind vrasës, janë shumë gjëra që shënjojnë jetën e sekujt duke ndikuar në mënyrë të pashmangshme në atë se çfarë do të jetë apo bëhet dikush.

Librat e mi të 2020-ës

7. Një tjetër suedeze si Camilla Läckberg, erdhi në shqip me librin e saj të shtatë, Mbytja, një nga më të bukurit e serisë. Në qendër historia e një shkrimtari të suksesshem me shumë dritëhije në të shkuarën e vet. Edhe ky një libër shumë inteligjent, nga ata fundi i të cilit është i pamundur për t’u zbuluar për nga mënyra aq misterioze sesi është ngjizur historia.

Librat e mi të 2020-ës

8. Një dëshirë e madhe për të jetuar i Fabio Volos, ky libër përkufizohet nga thjeshtësia e të shkruarit. Të thënit të gjërave troç, aq troç sa të duket se dikush t’i ka nxjerrë nga mendja teksa i ke menduar e t’i ka hedhur në një roman. Në fakt këtë bën Fabio Volo dhe mbase prandaj është kaq i dashur për lexuesin, sidomos për lexuesin e ri që priret të jetë më pak i sofistikuar, më i drejtpërdrejtë dhe që kërkon përgjigje më të shpejta. Frazat e Fabio Volos janë nga ato që të nguliten në mend shumë natyrshëm, edhe nëse ky nuk është qëllimi yt kryesor.

Librat e mi të 2020-ës

9. Banda e fëmijëve dhe Puthje e egër, nga i mirënjohuri Roberto Saviano, janë një diptik, dy romane të shkruara mjeshtërisht nga një njeri që të shkruarin e ka ngritur në një nivel shumë të lartë. Por ka dhe shumë aktualitet tema që trajtohet, fëmijët e lindur në një realitet të vështirë, qenie inteligjente e të pafajshme, por të gjendura në një kontekst pa mbrojtje dhe ku modeli i pasurimit të shpejtë është vetëm krimi e gjendet kudo, do të bien pre duke paguar edhe çmimin më të shtrenjtë, atë të jetës.

Librat e mi të 2020-ës

10. Dieta e jetëgjatësisë nga Valter longo, nuk është libër i 2020, por ai është bërë mantra e jetës sime, me atë kam bindjen se nëse bashkëjetoj do të jetoj gjatë dhe mirë. Valter Longo shpjegon hollësisht se çfarë i ndodh qelizës pas çdo ushqimi që hamë. Cili është stili i jetës që duhet përqafuar për të mbetur i ri brenda e për pasojë edhe jashtë.