Sekretet e Ildës

Të paguash për shërbimin, nuk të jep të drejtën të sillesh keq!

Të paguash për shërbimin, nuk të jep të drejtën

Nga Ilda Zaloshnja/ Klienti ka gjithmonë të drejtë! Rregulli i artë për këdo që hyn në biznes duke u shërbyer atyre. Nëse do të bësh një emër për blerësin tënd, ofro shërbim! Nëse do të vazhdosh ta mbash atë emër, epo vazhdo të ofrosh shërbim. Kryefjala e një shërbimi të mirë: mirësjellja!

Në të gjitha materialet e trainimeve për sipërmarrësit e çdo lloj kategorie biznesi, mësohet se si mirësjellja në komunikim dhe buzëqeshja janë dy armë të pandashme për ta bërë klientin të ndihet mirë, në mënyrë që pastaj të rikthehet.

Këtë frymë mundohemi edhe ne ndërmjetësit e pasurive të paluajtshme të përçojmë tek stafi ynë, aq më tepër që shërbimi që ne ofrojmë është shumë specifik, me ngarkesa emocionale dhe mbi të gjitha me pasiguritë që rrjedhin nga shpenzimi i një shume të madhe parash siç është ajo e blerjes së një prone.

Duke qenë se një pjesë e njerëzve mendojnë se shërbimi që ne ofrojmë është i panevojshëm, ata mund ta zgjedhin vetë një pronë, përse të paguajnë para për këtë punë, mirësjellja jonë dhe gatishmëria për t'i shërbyer të gjithë klientëve, edhe atyre më skeptikëve, merret shpesh për dobësi, si nevojë e skajshme për të kapur punën dhe për këtë arsye klienti mund të sillet me ne si të dojë...dhe ne shumë shpesh kapërdihemi.

Forma e tyre e komunikimit shpeshherë është fyese, duke filluar nga format më të thjeshta të të shprehurit, të gjitha në mënyrën urdhërore, deri te mospërgjigjet në telefon kur janë lënë takime apo ardhjet me vonesë, duke mos respektuar orare, e akoma më keq, nganjëherë edhe duke mos paguar për shërbimin e marrë.

E dimë që njerëzit janë të ndryshëm dhe secili prej tyre ka formim individual, që vjen nga shkolla, jeta, rrethanat familjare, etj.

Por a nuk do të ishte mirë që mirësjellja të ishte reciproke? Nëse ne, si klientë të një restoranti, presim që kamerieri të na shërbejë me mirësjellje e buzëqeshje, pse nuk duhet që edhe kamerieri të ketë të njëjtën pritshmëri? A nuk do t'ju shërbente ai akoma më mirë herës tjetër kur të shkoni tek i njëjti restorant?

Kështu edhe ne...jemi gjithmonë në përpjekje për t'u përmirësuar! Respekti dhe mirësjellja për punën që bëjmë nga klientët tanë veçse na shton motivimin për ta bërë atë akoma më mirë. Në fund të fundit, jemi njerëz si ju dhe bëjmë punën tonë njësoj si ju... disa prej nesh, me më shumë dashuri e pasion.