Aktualitet

10 vatra aktive zjarri, Ministria e Mbrojtjes: Nuk rrezikohet asnjë qytetar

10 vatra aktive zjarri, Ministria e Mbrojtjes: Nuk rrezikohet asnjë qytetar

10 vatra zjarri janë ende aktive në vendin tonë prej disa ditës, ndërsa Ministria e Mbrojtjes njofton se nuk paraqesin rrezik për qytetarët pasi ndodhen larg zonave të banuara.

Në njoftim bëhet me dije se janë angazhuar 200 efektivë të Forcave Ajrore, ndërsa vatrat e zjarrit janë aktive në Lezhë, në Gramsh, Fier, Mallakastër dhe Berat.

"Rreth 200 efektivë të Forcave të Armatosura u kanë ardhur në ndihmë forcave zjarrfikëse në disa bashki të vendit, ku janë evidentuar disa vatra zjarri. Deri më tani 10 vatra mbeten aktive, por nën monitorim dhe nuk paraqesin asnjë rrezik për qytetarët. Ndërkohë që 3 vatra janë shuar në qarkun e Dibrës.

Qendra Kombëtare Operacionale e Mbrojtjes Civile bën me dije se në Lezhë janë aktive 4 vatra zjarri, në njësinë administrative Shëngjin, zona Rëra e hedhur-Maja e Zezë dhe po punohet për izolimin e tyre. Zjarri në malin e Kakarriqit është izoluar pothuajse totalisht. Ndërsa në Rubik, në fshatin Katund i Vjetër, vatra ka intensitet të ulët dhe është nën monitorim. Në Elbasan ka patur një vatër zjarri në Gramsh në fshatin Siman. Policia ka nisur hetimin për shkaqet e zjarrit. Në Fier nga 3 vatra, 2 tashmë janë lokalizuar dhe janë drejt përmirësimit. Situata është nën kontroll edhe në fshatin Hekal në Mallkastër, ku u raportua për zjarr në sipërfaqe me shkurre ullishte dhe pemtari. Vështirësi ka paraqitur terreni në njësinë administrative Terpan në pyllin e Ballollit në Berat, por zjarri nuk përbën rrezik për komunitetin, pasi ndodhet larg zonave të banuara", njofton Ministria e Mbrojtjes.