Aktualitet

Ishin vajza të qeta, por jo si të tjerët... Dy mësueset e Anisës dhe Blertës tregojnë për sjelljen e tyre në shkollë

Ishin vajza të qeta, por jo si të tjerët... Dy mësueset e

Mësueset e dy vajzave të familjes Josifi, Anisës dhe Blertës, në kohën kur ato kanë jetuar në Përmet, dhanë detaje për sjelljen e motrave. Sipas tyre, Anisa dhe Blerta ishin vajza mjaft të qeta, të përkushtuara ndaj mësimeve. Mësueset thanë se gjatë kohës që vajzat kanë studiuar në shkollat ku ato punojnë, nuk kanë shfaqur interesin ndaj ndonjë sekti fetar. "Ishin vajza të qeta dhe jo shumë të hedhura në shoqëri, jo që të qeshnin e të luanin shumë si të gjithë të tjerët", komenton një nga mësueset.

“I njoh që të dyja vajzat, Blerta ka mbaruar në 2005-ën, i mbaroi të katërta vitet këtu te ne. Ndërsa Anisa ka mbaruar vetëm 2 vite dhe prej andej është larguar për në Tiranë. Jam tronditur shumë, kam kaluar në gjendje shoku. Kisha shumë respekt për të ëmën e vajzave dhe për vetë vajzat, për vetë familjen nga rridhte, ishin vajza shumë të mira. E ëma shiste në treg, kisha kontakt me të, thjesht si qytetare. Njihja babanë e tyre, sepse ishte pak a shumë moshatar me mua. Ka qenë njeri i respektuar dhe i nderuar në qytetin tonë. Jo nuk ka punuar, sepse ai kishte vite që kishte pësuar trombozën në krahë dhe nga kjo ai ka përjetuar traumë si person”, tha mësuese Luljeta për emisionin “Shqipëria Live”.

Edhe mësuese Elona, i kujton kështu vajzat e familjes Josifi:

“Po mesa mbaj mend, sepse të dyja vajzat i kam fytyra të njohura, për Anisën e kam pasur nxënëse. Ajo që mbaj mend është vajza të sjellshme, të rregullta, shembullore të qeta, vajza korrekte dhe me dëshirë për të mësuar. Nuk e kam ditur këtë pjesën e sektet fetare. Ishin korrekte si fëmijët e tjerë. Ishin vajza të qeta dhe jo shumë të hedhura në shoqëri, jo që të qeshnin e të luanin shumë si të gjithë të tjerët”.

Blerta është e vetmja e mbijetuar nga familja Josifi, motra e saj Anisa mendohet se ka ndërruar jetë në mars të 2019-s, ndërsa nëna e saj Zhaneta më 2 korrik./ Referuar TCH