Aktualitet

Mesazhi nga Ermonela Jaho: Të gjithë ne jemi lodhur nga Covid-19, por virusi jo! Kemi vetëm një opsion pa dalë ende vaksina

Mesazhi nga Ermonela Jaho: Të gjithë ne jemi lodhur nga Covid-19, por

Sopranoja e njohur Ermonela Jaho përcjell një videomesazh për qytetarët shqiptarë nga New York-u ku u bën apel të respektojnë masat që tashmë i dinë të gjithë, edhe pse disa vijojnë t'i neglizhojnë duke vënë në rrezik shëndetin e tyre, të familjarëve dhe të tjerëve përreth. Sopranoja Jaho shprehet se në kushtet kur nuk kemi ende një vaksinë kundër koronavirusit, të vetmet armë që na mbrojnë janë maska, distancimi dhe higjiena. 'Të gjithë jemi të lodhur nga Covid-19, por virusi nuk njeh lodhje', shprehet sopranoja Jaho e cila përsërit thirrjen të mbrohemi me mjetet që kemi në dorë për të ndaluar përhapjen.

Mesazhi i plotë i Ermonela Jahos:

Kur pandemia ishte në pikun e saj këtu në New York grupi më i ekspozuar ndaj infektimit ishin punonjësit e shëndetësisë, megjithëse në kontakt të përditshëm me të sëmurët ky grup pati numrat më të ulët të të infektuarve vetëm për dy arsye: Mbajtjen e maskave dhe respektimin strikt të higjenës.

Maskat funksionojnë dhe sëbashku me distancimin social dhe higjenën personale janë armët më të mira që kemi në dispozicion për të ruajtur shëndetin tonë, të familjeve tona dhe shoqërisë ku jetojmë.

Të gjithë jemi të lodhur nga COVID19, por virusi nuk njeh lodhje. I vetmi opsion që kemi deri në zhvillimin e vaksinave dhe mjekimeve të tjera antivirale janë maskat, distanca dhe higjena personale.

Ky virus nuk prek vetëm personat në moshë të thyer dhe dëmet që shkakton në shëndet nuk janë vetëm për personat që nuk i mbijetojnë dot, por edhe për ata që shërohen të cilëve ju lë pasoja për muaj të tërë. Edhe nëse rreziku për grupmoshën tuaj është i ulët mendoni për prindërit, gjyshet dhe gjyshërit tuaj.

Duke shpresuar që vaksina dhe mjekimi antiviral të zhillohen sa më shpejtë, ju ftoj të fitojmë kohë, duke ngadalësuar përhapjen me mjetet që kemi në dorën tonë, mbajtjen e maskave, distancimin social dhe higjenën personale.

Video-mesazhi është publikuar nga ministrja e Shëndetësisë Ogerta Manastirliu.