Aktualitet

Meta firmos ligjin për 'Regjistrin e Pronarëve Përfitues': Të nisë zbatimi pa u zvarritur

Meta firmos ligjin për 'Regjistrin e Pronarëve

Presidenti Meta dekretoi sot ligjin ‘Për Regjistrin e Pronarëve Përfitues’, për identifikimin dhe regjistrimin e pronarit përfitues të subjekteve tregtare dhe organizatave jofitimprurëse.

Në deklaratën e tij për mediat, Meta shprehet se pavarësisht se mund të ishtë më i qartë ky është një hap para drejt transparencës, ndërsa shton se ky nuk duhet të jetë thjesht një akt që miratohet për qëllime raportimi pranë Moneyval, por duhet të nisë menjëherë zbatimi pa u zvarritur.

Presidenti dekalron:

"Presidenti i Republikës, Sh.T.Z Ilir Meta, ka dekretuar me shpallje ligjin nr. 112/2020 “Për Regjistrin e Pronarëve Përfitues”.

Ky ligj është një rekomandim i përsëritur për Republikën e Shqipërisë nga Komiteti i Ekspertëve për Vlerësimin e Masave Kundër Pastrimit të Parave dhe Financimit të Terrorizmit (MONEYVAL) të Këshillit të Europës, për identifikimin dhe regjistrimin e pronarit përfitues të subjekteve tregtare dhe organizatave jofitimprurëse, të regjistruara në Republikën e Shqipërisë.

Ky ligj është një hap para drejt transparencës së zotëruesve të kapitalit të subjekteve tregtare, por që po në funksion të kësaj transparence, mund të kishte përcaktuar edhe më qartë detyrimin për deklarimin dhe regjistrimin e subjekteve, pa kufizime, në raport me aksionet/kuotat të kapitalit ose të interesave të pronësisë në një subjekt raportues.

Ky ligj nuk duhet të jetë një akt që miratohet vetëm për qëllime raportimi pranë Moneyval, por është me rëndësi themeltare për Shqipërinë, të nisë menjëherë zbatimi i tij dhe transparenca me zotëruesit e aksioneve, pa u zvarritur nga Këshilli i Ministrave nxjerrja e akteve nënligjore që mundësojnë fillimin e implementimit".