Në 15 shtator nis raundi i dytë i regjistrimeve në universitet! Gjithçka që duhet të dini
E Mërkurë 13 Shtator 2023, 19:05
TiranaPost
16 mijë maturantë mbyllën fazën e regjistrimeve në Universitet nga raundi i parë ndërsa në 15 shtator nis raundi i dytë i aplikimeve online për pjesën tjetër.
5500 maturantë pritet të aplikojnë në raundin e dytë të regjistrimeve i cili zgjat deri në 1 tetor. Më pas në programet e studimit ku kanë mbetur kuota të lira, kandidatët që kanë aplikuar në U-Albania mund të vijojnë të regjistrohen drejtpërdrejtë në universitet deri në plotësimin e gjitha kuotave.
Edhe këtë vit, nga raundi i parë disa prej degëve prioritare rezultojnë më pak të kërkuara. Në degën e fizikës janë ezauruar vetëm 14% e kuotave. Kimia dhe Italishtja nuk do të hapen këtë vit në Universitetin e Vlorës ndërsa vetëm 8.5% e maturantëve janë regjistruar në degën e mësuesisë. Interes të ulët ka patur dhe për programet histori, psikologji dhe gjuhët e huaja dhe disa degë të Bujqësorit.
Në universitetin e Korçës janë regjistruar mbi 400 studentë në raundin e parë. Rektori Dhimitri Bello thotë se programet 2 vjeçare në tëresi kanë pasur një ulje të numrit të studentëve. Programi “Filozofi Sociologji” nuk ka pasur asnjë regjistrim ndërkohë edhe programi 2 vjeçar Mbështetës Zyre për Komunikimin, Bibliotekën dhe Arkivë është ndër të riskuarit.
