Nuk mund t’i shpëtosh gjobës për maskën as kur je pasagjer në makinë!
769 këmbësorë apo pasagjerë që udhëtonin me makinë janë gjobitur pasi nuk kanë mbajtur maskën. Policia e Shtetit njofton se shumica e qytetarëve i kishin vendosur maskat mbrojtëse edhe në orët e mbrëmjes, por ata që janë kapur në shkelje janë gjobitur.
Sipas njoftimit, ishin 600 këmbësorë që u gjobitën me 3000 lekë, ndërsa nga ana e shërbimeve të Policisë Rrugore u vendosën 169 gjoba, për pasagjerë të cilët nuk kishin lidhje familjare me drejtuesit e mjeteve private dhe ishin pa maska mbrojtëse në mjet, si dhe për pasagjerët pa maska mbrojtëse në mjetet e transportit publik.
“Janë shoqëruar në ambientet e Policisë në të gjithë vendin, 22 shtetas, të cilët kanë thyer protokollet e sigurisë për parandalimin e përhapjes së COVID-19, duke u grumbulluar në tubime të paligjshme. Në përfundim të veprimeve këta shtetas janë proceduar penalisht dhe janë ndëshkuar edhe me masën administrative 3000 lekë secili”, thuhet në njoftimin e policisë.