Aktualitet

Pas motit të keq, ja si paraqitet situata në vend

Pas motit të keq, ja si paraqitet situata në vend

Ministri i Mbrojtjes, Niko Peleshi, ka dhënë informacione të përditësuara në lidhje me situatën e krijuar nga reshjet. Peleshi tha se ka rënë ndjeshëm sipërfaqja e tokës e mbuluar nga uji. Ndërsa shtoi se niveli i lumenjve ka rënë dhe reshjet po vijojnë me intensitet të ulët.

"Reshjet e shiut kanë vazhduar me intensitet të ulët gjatë natës dhe ka rënë ndjeshëm sipërfaqja e tokës së mbuluar me ujë në Shkodër. Aktualisht janë vetëm 26 familje të evakuuara. Në Lezhë ka pasur përmirësim të ndjeshëm dhe ka prani uji vetëm në 4 banesa në 24 që ishin dje.

Rrugët në rajonin e veriut janë të kalueshme, me përjashtim të disa segmenteve. Nuk ka pasur probleme për sa i përket lëvizjeve në akset jugore dhe qendrore. Po punohet dhe po bëhet një kontroll i urave. Ka rënie të ndjeshëm niveli i lumit Drin dhe Bunës.

Në këtë situatë vihet re një rritje e përgjegjshmërisë dhe nivelit të bashkëpunimit me njësitë e pushteti vendor. Përgjigjja ka qenë e shpejtë dhe ka pasur bashkëpunim të mirë me të gjitha bashkitë pa përjashtim, theksoi ministri.

Të gjitha bashkitë kanë patur dhe kanë në dispozicion fondin e emergjencave prej 10 mln euro, i ndarë në proporcion me buxhetet e bashkive. Fond i cili është parashikuar edhe në buxhetin e vitit të ardhshëm", deklaroi Peleshi.