Aktualitet

Praktika profesionale e kandidateve për mësues shkurtohet nga 1 vit në 3 muaj

Praktika profesionale e kandidateve për mësues shkurtohet nga 1 vit

Është shkurtuar nga një vit në 3 muaj praktika profesionale për mësuesit. Lajmin e ka bërë të ditur ministrja e Arsimit Evis Kushi me anë të një njoftimi në Facebook. Kushi shkruan se ky hap mundëson pjesëmarrje më të shpejtë të mësuesve në portal e më pas për punësim

Statusi i plotë i Ministres Evis Kushi:

Dëshiroj të informoj të gjithë studentët dhe të sapodiplomuarit për mësuesi se me Urdhër Nr. 437, datë 20.07.2022, me ndryshimet e reja në Rregulloren e Praktikës Profesionale për profesionin e rregulluar të mësuesit, periudha e praktikës pas studimeve master nuk do të zgjasë më 1 vit, por vetëm 3 muaj (një periudhë mësimore).

Shkurtimi i kësaj periudhe vjen si unifikim i kohëzgjatjes së praktikës edhe me profesionet e tjera të rregulluara, si ai i mjekut, i infermierit dhe i psikologut, të cilët gjithashtu e kanë kohëzgjatjen e praktikës 3 muaj. Kjo mundëson pjesëmarrje më të shpejtë të mësuesve në portal e më pas edhe për punësim.

Në fokus të vëmendjes sonë janë pa dyshim nxënësit, për arsim cilësor e gjithëpërfshirës, por gjithashtu edhe mbështetja dhe vlerësimi i mësuesve në misionin e tyre për edukimin e brezave.

Tiranapost.al