Aktualitet

Shkollat në Tiranë do të vijojnë mësimin normalisht në 6 dhjetor

Shkollat në Tiranë do të vijojnë mësimin normalisht

6 dhjetori, dita kur do të mbahet samiti BE-Ballkan Perëndimor nuk do të jetë ditë pushimi për shkollat në Tiranë. Kështu ka lajmëruar ministrja e Arsimit, Evis Kushi, me anë të një postimi në rrjete sociale.

Postimi i plotë i Kushit në Facebook

E detyruar nga pyetja e vazhdueshme "A do jenë pushim shkollat në datën 6?” po e ripërsëris se ditën e martë, datë 6 dhjetor, mësimi do të vijojë normalisht në të gjitha shkollat e Tiranës.

Samiti BE-Ballkani Perëndimor, i cili do të mbahet në Tiranë më 6 dhjetor është një ngjarje e jashtëzakonshme dhe historike për Shqipërinë. Për herë të parë, të gjithë liderët e BE-së mblidhen në një vend jashtë BE-së për një samit të Këshillit Evropian. Ky është nder dhe vlerësim i madh për vendin tonë, por s’ka arsye për të ndaluar procesin mësimor. Madje i ftoj të gjithë mësuesit, në të gjithë vendin, që ta shfrytëzojnë këtë ditë kaq të veçantë për të ndarë me nxënësit opinionet për rrugëtimin e vështirë evropian të atdheut tonë.

Ndjesë për të gjithë ata që mund të jenë keqinformuar nga media të ndryshme, rrjetet sociale apo burime të tjera jozyrtare dhe mësim të mbarë!