Shoferi që goditi makinën me katër vajzat ishte me shpejtësi tej normave: Çfarë zbuloi tjetër ekspertiza
Një aksident tragjik ndodhi mbrëmjen e djeshme ku dy vajza të reja humbën jetën, ndërsa dy të tjera u plagosën dhe janë të shtruara në spital në gjendje të rëndë. Ato po udhëtonin me një makinë të tipit Volkswagen kur një makinë Benz i goditi nga pas.
Po si ndodhi ngjarja tragjike? Sipas ekspertizës, shoferi Behar Pema, 58 vjeç ka qenë me shpejtësi 160 kilometër për orë, ndërkohë që në testin e alkoolit rezultoi se kishte pirë në nivelin 0.99 mg/ l.
Në vendin ku ndodhi aksidenti tragjik, në dalje të tunelit të Elbasanit nuk janë gjetur shenja frenimi nga ana e shoferit, dhe goditja ka qenë fatale për dy nga vajzat në sediljen e pasme të Volkswagenit. Për pasojë humbën jetën: Lusinda Garunja dhe Xheneta Qallia, banuese në Shkodër, 23 dhe 21-vjeçe.
Ndërsa të plagosura mbetën shoferja Denisa Dibra, 26 vjeçe dhe motra e Lusindës, Nervida Garunja.
U deshën forcat zjarrfikëse që të nxirrnin vajzat e bllokuara prej disa minutash brënda makisës.
Shoferi i Benzit, Behar Pema është marrë në pyetje mbrëmë nga policia dhe pas testit të alkoolit është arrestuar.