Vijon puna për shuarjen e zjarrit në Porto Palermo, Ministria: Terreni i vështirë
E Shtunë 19 Gusht 2023, 12:12
TiranaPost
Një tjetër zjarr këtë herë në Porto Palermo ka dëmtuar pyjet e zonës. Ndërsa zjarrvënësit këtë verë duket se po ia hedhin drejtësisë lufta me flakët vijon të jetë e vështirë për uniformat e mbrojtjes.
Sipas ministrit të Mbrojtjes Niko Peleshi zjarri në Porto Palermo është tashmë nën kontroll por për shuarjen e tij është dashur angazhimi i të paktën 40 trupave si dhe i një helikopteri.
“40 efektivë të Batalionit të tretë të Këmbësorisë nga Forca Tokësore janë angazhuar sot për shuarjen e zjarrit masiv në Porto Palermo. Mbrëmjen e djeshme u ndërhy edhe me helikopterin Cougar, i cili është rikthyer edhe sot në mëngjes në zonë. Puna është e vështirë për shkak të terrenit, ku është përhapur zjarri,” shprehet Peleshi.
Sipas të dhënave zyrtare, vetëm gjatë dy javëve të para të muajit Gusht janë raportuar 95 vatra zjarri ndërsa 212 të tjera u regjistruan në qershor dhe korrik.
Kryeminisri Edi Rama ka tërhequr disa herë gjatë kësaj vere vëmendjen e prokurorëve sidomos nëpër rrethe, të cilët sipas tij i lënë të lirë autorët e zjarreve edhe kur ata kapen nga Policia.
