Aktualitet

Zbardhet opinioni i ‘Venecias’për Kushtetuesen: Duhet dialog për procedurën e emërimeve. Betimi i paqartë

Zbardhet opinioni i ‘Venecias’për Kushtetuesen: Duhet dialog

Komisioni i Venecias i dërgon opinionin Kuvendit lidhur me krizën dhe përplasjen për emërimet në Gjykatën Kushtetuese mes presidentit dhe maxhorancës.

Në dokumentin e bërë publik, Venecia thotë se divergjenca e qartë e interpretimit të procedurës së emërimit President – Kuvend – Gjykatë e Lartë në rastin konkret kur listat përbëhen kryesisht nga të njëjtët kandidatë palët në proces duhet të bien dakord. Gjithashtu thotë se rregulli i radhës për emërimet aplikohet vetëm në momentin e shpalljes nga Kryetari i Gjykatës Kushtetuese të vakancave, pas hapjes së secilit raund të emërimeve.

Konkretisht:

“Pasi të jenë shpallur vakancat për trupat përkatëse të emërimit, sekuenca nuk kërkon aktivizim deri në raundin tjetër. Për sa kohë që mungesa e kandidatëve vazhdon dhe listat përbëhen kryesisht nga të njëjtët kandidatë, në një situatë kur ka emërime që duhen bërë, Presidenti dhe Kuvendi (dhe Gjykata e Lartë, nëse fillon të funksionojë së shpejti) duhet të bien dakord për procedurën që do të ndiqet".

Lidhur me ngërçin e krijuar për emërimet, Venecia kërkon që palët të mund të thjeshtojnë procesin. Konkretisht, Komisioni i Venecias thotë se modeli i vitit 2016 është komplekt dhe rekomandon thjeshtimin e procesit:

"Komisioni i Venecias është i mendimit se modeli kushtetues i miratuar në vitin 2016 është tepër kompleks, dhe në planin afatgjatë do të rekomandonte thjeshtësimin e tij, në radhë të parë duke hequr rregullin e sekuencës.

Së dyti, vitet e përcaktuara të fillimit dhe mbarimit të mandateve nëntëvjeçare duhet të jenë hequr. Gjykatësit kushtetues gjithmonë duhet të gëzojnë një mandat të plotë nëntë-vjeçar, edhe nëse ato zgjidhen me vonesë ose nëse marrin një mandat i cili u ndërpre më herët. Ndryshimi nuk duhet të krijojë probleme pasi sekuenca të hiqet".

Lidhur me betimet që maxhoranca miratoi ligjin që i heq kompetencën presidentit dhe betimet mund të bëhen edhe me shkrim, dhe kështu ti dorëzohet presidentit nëse nuk thirret brenda një afati kohor, Komisioni e quan të paqartë këtë përcaktim. Kështu Venecia i jep të drejtë Metës për rastin e Arta Vorpst.

"Sa i përket procedurës së betimit: Nëse vlerësohet e nevojshme për të shmangur ngërçin në raste të qarta abuzimi, kohët e fundit dispozitat e miratuara duhet të zëvendësohen nga një dispozitë më e qartë e formuluar në nivel kushtetues"

Në fund apeli është i njëjtë sit ë gjithë ndërkombëtarët: Dialog politik.

"Komisioni i Venecias rithekson nevojën absolute për dialog dhe bashkëpunim ndërmjet institucioneve shtetërore. Mandati dhe kompetencat e institucioneve shtetërore duhet të jenë të respektuar në mënyrë që ata të përmbushin objektivat e tyre legjitime institucionale.

Kultura demokratike dhe pjekuria kërkojnë kufizim institucional, besim të mirë dhe respekt të ndërsjellë ndërmjet institucioneve shtetërore".

Po ashtu thirrja e Komisionit të Venecias është që të plotësohen sa më shpejt vendet vakante në Gjykatën Kushtetuese dhe në Gjykatën e Lartë.

-Pas publikimit nga mediat të dokumentit, vjen reagimi i zëdhënësit Tedi Blushi. Me argumentin se ky draft ka rrjedhur në mënyrë jo zyrtare, Blushi shprehet se presidenti Meta do të flasë vetëm para opinionit Final të Komisionit të Venecias.

Reagimi:

Presidenti i Republikës Sh.T.Z Ilir Meta, siç rikonfirmoi qartë sot, ka zbatuar vetëm Kushtetutën që ka shkruar "Venecia" me dorën e saj për Gjykatën Kushtetuese në vitin 2016. Institucioni i Presidentit as nuk rrjedh raporte konfidenciale dhe as i komenton ato. Institucioni i Presidentit komentet finale për "Venecian" do t'i bëjë publike përpara Opinionit Final në mënyrën më transparente. I ftojmë dhe aktorët e tjerë t'i bëjnë publike arsyetimet e tyre të mjera dhe politike. Për presidentin Meta, Kushtetuta është e paprekshme dhe ligji më i lartë në Republikën e Shqipërisë.

Zbardhet opinioni i ‘Venecias’për Kushtetuesen: Duhet dialog