Unë Ennio Morricone kam... Kompozitori ka lënë gati statusin e vdekjes së tij bashkë me falenderimet dhe një lamtumirë të dhimbshme
E dhimbshme, e jashtëzakonshme, emocionuese letra/status e Ennio Morricone që vendosi ta lajmërojë me fjalët e tij vdekjen e vet. Kompozitori kërkon një funeral privat duke shtuar se nuk do të shqetësojë askënd. Pastaj përmend emrat e njerëzve që deshi shumë. Mbyllja të bën të qash edhe prej guri të jesh.
E Hënë 6 Korrik 2020, 16:12
TiranaPost
“Che tempo che fa” jep statusin e lënë gati nga kompozitori i mirënjohur, Ennio Morricone dhe në pak fjali, ai përmend emrat e njerëzve të jetës së tij. Lexoni statusin prekës:
"Unë, Ennio Morricone kam vdekur. Ua njoftoj kështu të gjithë miqve që kanë qenë gjithmonë pranë meje dhe gjithashtu atyre që janë pak larg, që i përshëndes me shumë dashuri. Është e pamundur t’i përmend të gjithë. Por një kujtim i veçantë është për Peppuccio-n dhe Roberta-n, miq të dashur shumë të pranishëm në vitet e fundit të jetës sonë.
Ekziston vetëm një arsye që më shtyn t’i përshëndes të gjithë kështu dhe të mbahet një funeral privat: Nuk dua t’ju shqetësoj.
Përshëndes ngrohtësisht Ines, Laura, Sara, Enzo dhe Norbert, sepse kanë ndarë një pjesë të madhe të jetës sime me mua dhe familjen time. Dua të kujtoj motrat e mia Adriana, Maria, Franca dhe partnerët e tyre me dashuri dhe t’u them se i kam dashur shumë. Një përshëndetje e fortë dhe e thellë për fëmijët e mi Marco, Alessandra, Andrea, Giovanni, nusen e djalit, Monica dhe nipërit e mbesat e mia Francesca, Valentina, Francesco dhe Luca. Shpresoj që ata ta kuptojnë se sa shumë i kam dashur. E fundit, por jo më pak e rëndësishme (Maria). Për të ripërtërij dashurinë e jashtëzakonshme që na ka mbajtur bashkë dhe që më vjen keq ta braktis. Për ty lamtumirën më të dhimbshme”.
- Fjalët e Ennio Morricone për nekrologun janë shkruar me dorën e tij.
