Urimi i veçantë i vajzës së shkrimtarit Ismail Kadare për ditëlindje
E Shtunë 28 Janar 2023, 19:30
TiranaPost
Besiana Kadare, vajza e shkrimtarit të madh të letërsisë shqipe, Ismail Kadare ka publikuar sot në ditën e ditëlindjes së 87 të babait të saj një prej poezive më të njohura të tij, “Të huaj jemi”.
E bija e shkrimtarit të madh thotë se të risjellësh apo të rilexosh një prej veprave të një shkrimtari, është mënyra më e mirë për ta bërë atë të lumtur, qoftë edhe në ditën e tij të lindjes.
Dhe kështu bëri edhe ajo vetë!
Postimi i Besiana Kadare:
Mënyra më e mirë për të uruar një shkrimtar është të rilexosh/ zbulosh librat e tij. Me rastin e ditëlindjes së Kadarese sot, po ndaj me ju një nga poemat e mia të preferuara, shkruar në 1964:
Të huaj jemi
Të huaj jemi ne prej kohësh,
Ç'ish për t'u thënë është thënë,
Si gurët që zënë vend në tokë,
Në jetë vend ne kemi zënë.
Drejt njeri-tjetrit kemi mbyllur
Të gjitha rrugët edhe shtigjet,
Si dy qytete mesjetare
Me mure, heshta dhe me pirgje.
Por natën, kur i lodhuri truri,
Portat i mbyll me qetesi,
Ti gjen një shteg dhe futesh brenda,
Një shteg që vetëm ti e di.
Pastaj si në rrugica parqesh,
Shetit mes cirkovolucionesh,
Hyn nëpër ëndrra e shkujdesur,
Fanitesh, qesh, ma bën me dorë.
Por kur mëngjesi zë afrohet,
Nis shqetësohesh befas ti,
Dhe heshturazi del përjashta
Nga shtegu, që del veç ti.
E dita vjen. Rrjedh prapë jeta.
Dhe ne të dy si dhe më parë
Të ftohtë rrimë e të pamposhtur
Si dy qytete mesjetare.
