Gjykata e San Franciskos publikon videon e sulmit ndaj Paul Pelosit
E Premte 27 Janar 2023, 21:56
TiranaPost
Gjykata e Lartë e San Franciskos publikoi të premten videon e regjistruar nga Policia gjatë sulmit të vitit të kaluar ndaj bashkëshortit të Nancy Pelosi, Paul Pelosi.
Pamjet e rënda të kamerës së trupit të një prej oficerëve që mbërritën në shtëpinë e Pelosit më 28 tetor 2022, kur ai u sulmua, shfaqin kaosin e momentit kur David DePape sulmoi bashkëshortin e ish-Kryetares së Dhomës së Përfaqësuesve, Nancy Pelosi.
Në video, fillimisht edhe Pelosi edhe DePape po mbajnë një çekiç në dorë ndërkohë që agresori me dorën tjetër mban krahun e Pelosit kur oficerët hapën derën.
“Hiqni çekiçin,” thotë oficeri.
Por sulmuesi e merr çekiçin nga dora e Pelosit, hidhet drejt tij dhe e godet në kokë. Oficerët neutralizojnë më pas agresorin.
Këto pamje dhe disa të tjera nga kamerat e sigurisë u përdorën si provë në Gjykatë, me gjithë kundërshtitë e avokatit të të akuzuarit sipas të cilit kjo do të dëmtonte në mënyrë të pariparueshme të drejtën e tij për një gjykim të drejtë.
Pas publikimit të videos, duke folur shkurtimisht me gazetarët, Nancy Pelosi tha se nuk do të shihte pamjet e sulmit ndërsa shtoi se bashkëshorti i saj Paul Pelosi po e rimerr tashmë veten.
