Katër fëmijë që i mbijetuan një aksidenti ajror gjenden të gjallë pas 40 ditësh në xhunglën kolumbiane
E Shtunë 10 Qershor 2023, 15:00
TiranaPost
Katër fëmijë kanë mbijetuar për 40 ditë me radhë në një xhungël kolumbiane ku ranë pas një aksidenti ajror që ndodhi më 1 maj.
U desh më shumë se 1 muaj që autoritetet të binin në gjurmët e të mbijetuarve jo vetëm të aksidentit të rëndë ajror por edhe të qëndrimit në kushte aq të vështira sa dhe operacioni i kërkim-shpëtimit.
Ministria e Mbrojtjes kolumbiane tha se pjesa më e vështirë e operacionit ishte ajo e sjelljes së katër fëmijëve nga pylli i dendur i Guaviare në të cilin u gjetën, në një helikopter që ndodhej mbi 60 metra lartësi pasi nuk mund të ulej për shkak të pemëve.
Forcat speciale të ushtrisë shihen në videot e shpërndara në internet duke marrë katër fëmijët në krahë dhe me ndihmën e një kablli metalik të lidhur me një çikrik të drejtuar nga avioni, i kanë marrë në bord.
Fëmijët kanë udhëtuar nga San Joseé del Guaviare për në kryeqytetin Bogota me avion ushtarak, së bashku me babanë e tyre, njërin nga gjyshërit dhe anëtarët e tjerë të familjes.
Në bazën ajrore i prisnin katër autoambulanca të cilat i transferuan në spitalin ushtarak në Bogota ku do të kryejnë kontrollet mjekësore, pasi fëmijët ishin në gjendje shëndetësore të dobët.
