Sot zhvillohen zgjedhjet në veri të Kosovës, Lista Serbe nuk merr pjesë
E Diel 23 Prill 2023, 08:31
TiranaPost
Në Veri të Kosovës po zhvillohen sot zgjedhjet e parakohshme lokale.
Qendrat e votimit u hapën në orën 07:00, ndërkohë që qytetarët do të votojnë për të zgjedhur drejtuesit lokale.
Numri i përgjithshëm i qytetarëve që mund të votojnë, sipas KQZ-së, është 45.095. Qendrave të votimit për të zgjedhur kryetarët e rinj të komunave do u drejtohen qytetarët në komunat Mitrovicë e Veriut, Leposaviq, Zubin Potok dhe Zveçan.
Situata aktuale është e qetë ndërsa vërehet numër jo i madh i qytetarëve, sidomos në zonat e banuara me shqiptarë, të cilët kanë dalë në mëngjes për të ushtruar detyrën e tyre të votës.
Këto zgjedhje po mbahen pasi serbët, në shenjë proteste për vendimin e Qeverisë për targat, u larguan nga të gjitha institucionet e Republikës së Kosovës.
Në këto zgjedhje nuk do të marrë pjesë partia më e madhe e serbëve, Lista Serbe, pasi pjesëmarrjen e saj e ka kushtëzuar me krijimin e asociacionit dhe tërheqjen e njësive speciale të Policisë së Kosovës.
