Ekzekutohet 71-vjeçari në Elbasan! RENEA ndërhyri në banesën e tij, i moshuari nuk pranoi të dorëzohej
Ekzekutohet pas rreth 5 orësh rezistencë 71-vjeçari Lefter Zhidru, në Elbasan. RENEA ndërhyri duke shpërthyer derën e të moshuarit, i cili nuk pranoi të dorëzohej por iu përgjigj duke qëlluar në drejtim të tyre. Me reagimin e tij pati edhe kundërpërgjigje nga ana e RENEA-s, të cilët ekzekutuan të moshuarin.
Ekzekutimi erdhi pas dështimit të disa negociatave me të moshuarin, i cili pati një bisedën me të bijën dhe të afërm të tjerë.
Bëhet me dije se në operacion u përdor fillimisht gaz lotsjellës, i ngjashëm me atë të përdorur nga policia edhe gjatë protestave, me qëllimin për ta neutralizuar të moshuarin.
Pas këtij momenti, Zhidru qëlloi me breshëri ndaj forcave të policisë, por nuk pati të lënduar nga radhët e tyre. RENEA qëlloi me tre plumba drejt tij.
Ngjarja u regjistrua në lagjen “11 nëntori”, rreth orës 17:50, ndërsa situata nisi mbi 5 orë më parë, pasi ish-bashkëshortja Floresha denoncoi në polici dhunën e ushtruar prej tij. Pas denoncimit, ishin forcat Shqiponja që ndërhynë në konfliktin mes tij dhe ish-gruas, kur 71-vjeçari Lefter Zhidru qëlloi me armë në drejtim të tyre dhe plagosi 2 kalimtarë të rastit. Këta të fundit ndodhen jashtë rrezikut për jetën.