Alarmi i Antonio Gutierres: Kjo verë tregoi se katastrofa e klimës po ndodh
E Mërkurë 6 Shtator 2023, 13:18
TiranaPost
Sipas Organizatës Botërore Meteorologjike (WMO), Toka ka regjistruar gjatë këtij viti verën e saj më të nxehtë të Hemisferës Veriore të matur ndonjëherë.
Gushti ishte rreth 1.5 gradë Celsius më i ngrohtë se mesatarja para-industriale, që është pragu i ngrohjes që bota po përpiqet të mos e kalojë.
Oqeanet e botës - më shumë se 70 për qind e sipërfaqes së Tokës - ishin më të nxehtit e regjistruar ndonjëherë , gati 21 gradë Celsius.
Shkencëtarët fajësojnë ndryshimet klimatike gjithnjë e më të ngrohta të shkaktuara nga njeriu me një shtytje shtesë nga një El Nino, që është një ngrohje e përkohshme e pjesëve të Oqeanit Paqësor që ndryshon motin në mbarë botën.
“Ngrohja globale mbërriti”, tha në një deklaratë Sekretari i Përgjithshëm i Kombeve të Bashkuara, Antonio Guterres.
Shkencëtarët kanë përdorur unaza pemësh dhe tregues të tjerë për të vlerësuar se temperaturat tani janë më të ngrohta se sa kanë qenë në rreth 120,000 vjet.
Deri më tani, temperaturat ditore të shtatorit janë më të larta se ato që janë regjistruar më parë për këtë periudhë të vitit, sipas Reanalyzer Climate të Universitetit të Maine.
