Mbreti Charles do të shtrohet në spital pas problemeve shëndetësore
E Mërkurë 17 Janar 2024, 22:19
TiranaPost
Mbreti Charles III pritet të shtrohet në spital javën e ardhshme për të trajtuar një komplikim në prostatë.
Pallati Buckingham ka thënë se gjendja e Mbretit është e mirë, por ai do t’i nënshtrohet një “procedure korrigjuese”.
Lajmi vjen pak pasi është njoftuar se Princesha e Uellsit është në spital, pasi i është nënshtruar një operimi abdominal.
“Është e zakonshme për mijëra burra çdo vit, Mbreti ka kërkuar trajtim për prostatë të zmadhuar”, është thënë në deklaratë.
Prostata beninje e zmadhuar – që është jokancerogjene – është e zakonshme për burrat mbi 50 vjet dhe zakonisht nuk është gjendje serioze shëndetësore, sipas autoriteteve shëndetësore britanike.
Rreth një në tre burra mbi moshën 50-vjeçare mund të kenë simptoma të prostatës së zmadhuar, e cila shkaktohet nga një gjëndër poshtë fshikëzës.
Kjo gjendje shëndetësore nuk nënkupton se pacienti ka rrezik të madh për të pasur kancer të prostatës.
