Lajme nga Bota

Melania Trump: Jam e zhgënjyer dhe e dëshpëruar me dhunën e javës së kaluar. Të turpshme sulmet ndaj meje

Melania Trump: Jam e zhgënjyer dhe e dëshpëruar me dhunën e

Si të gjithë ju, unë kam reflektuar rreth vitit të kaluar dhe sesi armiku i padukshëm, Covid-19, preku vendin tonë të bukur. Të gjitha kombet kanë përjetuar humbjen e njerëzve të dashur, rënien ekonomike dhe ndikimet negative të izolimit.
Si Zonja juaj e Parë, ka qenë frymëzuese të dëshmoja nga afër se çfarë njerëzit e Kombit tonë të madh kanë bërë për njeri-tjetrin, veçanërisht kur jemi një nga vendet më të prekura.

Me gati çdo përvojë që kam pasur, e gjeta veten duke kujtuar histori të shumë individëve që tashmë janë në zemrën time.
Kohët e fundit lutjet e mia janë për: Veteranët e Forcave Ajrore, Ashli Babbit, Benjamin Philips, Kevin Greeson, Rosanne Boyland dhe Oficerët e Policisë së Kapitolit, Brian Sicknick dhe Hoëard Liebengood. Unë lutem që familjet e tyre të gjejnë forcë gjatë kësaj periudhe kaq të vështirë.

Jam e zhgënjyer dhe e dëshpëruar me atë që ndodhi javën e kaluar. Më duket e turpshme që rreth këtyre ngjarjeve tragjike ka pasur thashetheme të shumta, sulme të padrejta personale dhe akuza të gabuara ndaj meje nga njerëz që kërkojnë të jenë të rëndësishëm.

Kjo periudhë është e rëndësishme për rikuperimin e vendit tonë dhe qytetarëve të tij. Nuk duhet të përdoret për përfitime personale.

Kombi ynë duhet t’ia dalë në mënyrë të civilizuar. Unë absolutisht e dënoj dhunën që ka ndodhur në Kapitolin e vendit tonë. Dhuna nuk është kurrë e pranueshme.

Si një amerikane, unë jam krenare për lirinë e vendit tonë, ku gjithsecili shpreh pikëpamjet pa hezitim. Është një nga idealet kryesore mbi të cilin Amerika është krijuar.

Shumë kanë sakrifikuar për të mbrojtur të drejtën. Duke pasur këtë në mendje, unë do të doja t’u bëja thirrje qytetarëve të këtij vendi të gjejnë pak kohë për të reflektuar dhe për t’i parë gjërat nga të gjitha perspektivat.

I lutem njerëzve që të ndalojnë dhunën, të mos bëjnë kurrë supozime të bazuara për ngjyrën e lëkurës së një personi ose të përdorin ideologji të ndryshme politike si bazë për agresion dhe viciozitet.

Ne duhet të dëgjojmë njëri-tjetrin, të përqendrohemi në atë që na bashkon dhe të ngrihemi mbi atë që na ndan.
Është frymëzuese të shohësh kaq shumë persona që kanë pasion dhe entuziazëm për të marrë pjesë në zgjedhje, por ne nuk duhet të lejojmë që ai pasion të kthehet në dhunë.

Qëllimi ynë është të jemi të bashkuar dhe të jemi njerëz të mirë dhe të fortë që unë e di se jemi.
Forca dhe karakteri i vendit tonë e ka treguar se mund t’ia dalë pavarësisht ndikimit nga katastrofat natyrore dhe kësaj pandemie të tmerrshme që ka prekur të gjithë.

Pika e përbashkët në të gjitha këto situata sfiduese është vendosmëria e palëkundur e Amerikës për të ndihmuar njëri-tjetrin. Dhembshuria juaj ka treguar frymën e vërtetë të vendit tonë.

Siç e thashë edhe gjatë verës, janë këto momente që përcaktojnë vendosmërinë tonë në momentin që do t’u themi nipërve dhe mbesave se përmes ndjeshmërisë, forcës dhe vendosmërisë, ne ishim në gjendje të mbanim premtimin për të ardhmen e vendit tonë.

Secili prej jush është shtylla kurrizore e këtij vendi. Ju jeni njerëzit që vazhdoni të bëni Shtetet e bashkuara të Amerikës atë që është sot dhe keni përgjegjësinë për të përgatitur brezat tanë të ardhshëm, për ta bërë këtë vend më mirë se sa e gjetën.
Ka qenë nder i jetës sime të shërbej si Zonja juaj e Parë. Unë dua të falënderoj miliona amerikanë që mbështetën burrin tim dhe mua gjatë 4 viteve të fundit dhe treguan dedikimin e pabesueshëm të shpirtit amerikan.

Ju jam mirënjohëse të gjithëve.

Më e rëndësishmja, unë kërkoj mirëkuptim dhe paqe për Kombin tonë të madh. Çdo ditë le të kujtojmë se ne jemi një komb nën Perëndinë.

Zoti ju bekoftë të gjithëve dhe Zoti i bekoftë Shtetet e Bashkuara të Amerikës.
Sinqerisht,
Melania Trump.