Në Valencia shpërthejnë protestat. Shkak keqmenaxhimi i situatës me përmbytjet
E Diel 10 Nëntor 2024, 09:45
TiranaPost
Qindra mijëra njerëz kanë dalë në sheshin kryesor në Valencia për të protestuar kundër guvernatorit.
Ata kërkojnë dorëheqjen e tij, duke e konsideruar keqmenaxhim, situatën e përmbytjeve.
Në këtë katastrofë natyrore humbën jetën të paktën 220 njerëz në juglindje të Spanjës.
Në orën 18:00 dje, nga Plaza del Ayuntamiento, ku ndodhet komuna, qëndronte një banderolë me një imazh me kokë poshtë të guvernatorit të Valencias.
Marshimi fillimisht u zhvillua në heshtje, për t'u përkujtuar viktimat e përmbytjes, më pas u ngritën parulla kundër Mazonit, por edhe kundër qeverisë qendrore, e cila "Mund të kishte bërë shumë më tepër", sipas protestuesve.
Ka pasur edhe disa momente tensioni kur fishekzjarret u hodhën drejt zyrës komunale.
Gjatë marshimit, demonstruesit thërrisnin "Vrasës!"
Qindra njerëz u mblodhën edhe në Madrid. Ata brohorisnin "Mazón dorëhiqu".
Sipas të dhënave të fundit zyrtare, vdekjet e konfirmuara janë 220, nga të cilat 27 janë ende të paidentifikuar dhe 50 persona rezultojnë të zhdukur.
