Tre viktima nga koronavirusi në Itali: Rriten rastet me të infektuar, mjekët s’po gjejnë pacientin zero
E Diel 23 Shkurt 2020, 17:56
TiranaPost
Numri i të infektuarve me koronavirusin Covid-19 në Itali po rritet orë pas ore. Mediat italiane raportojnë për një viktimë të tretë, një grua e moshuar e cila ishte shtruar në spital, por nuk i mbijetoi dot virusit. E moshuara ishte shtruar në spitalin onkologjik të Cremona-s, ku përveçse ishte prekur nga koronavirusi, kishte situatë të komplikuar shëndetësore. Dje humbën jetën një burrë 78 vjeç dhe një grua 67 vjeçe.
Deri më tani numërohen 150 të prekur, ndërsa 154 të tjerë presin përgjigjet e analizave.
Virusi ka mbërritur edhe në Venecia, ku u vendos të pezullohen Karnavalet. Një 17 vjeçar banor në një qytet të Valtellina-s që studion në institutin bujqësor Codogno rezultoi pozitiv. Në Monza ka një pacient në kujdes intensiv. Një pacient në San Raffaele në Milano doli gjithashtu pozitiv. Vizitat e të afërmve dhe miqve të pacientëve janë të ndaluara, pasi ata janë të vendosur në repartet e kujdesit intensiv.
Italia Veriore është blinduar, Lombardia dhe Veneto kanë mbyllur shkollat dhe janë pezulluar të gjitha aktivitetet.
Ndërkohë mjekët janë në ‘gjueti’ për të gjetur pacientin zero, pasi pa identifikimin e tij, është shumë e vështirë për të parashikuar dhe ndaluar përhapjen.
