Aktualitet

Meta reagon për ‘videon’ e ambasadorit Soreca dhe zv.ministres së Ramës: Do kërkoj zyrtarisht hetim për shantazhuesit

Meta reagon për ‘videon’ e ambasadorit Soreca dhe zv.ministres

Pas deklaratës mbrëmë të ambasadorit Soreca, i cili u pyet për aludimin në media për një video intime mes tij dhe zv.ministres Romina Kuko ka reaguar presidenti Meta. Përmes një  postimi të gjatë, Meta kërkon që institucionet e drejtësisë, Policisë së Shtetit dhe Shërbimi Informativ Shtetëror, të nisin menjëherë hetimet për zbardhjen; pa asnjë vonesë të autorëve dhe urdhëruesit të këtij shantazhi të dënueshëm ndaj dy autoriteteve.

Meta shpreh solidaritet me ambasadorin Soreca, thotë se për zv.ministren Kuka është përfolur paturpësisht në këtë çështje dhe u bën thirrje gazetarëvetë distancohen urgjentisht nga çdo skenar i fabrikimit të lajmeve të rreme me qëllim shantazhimin e Ambasadorit të BE dhe çdo diplomati tjetër në Tiranë.

Kujtojmë se në një artikull të publikuar vjet, Nikoll Lesi shkruante se “burime të rezervuara” i kanë treguar sipas tij se një ambasador është në listë për t’u shpallur non-grata nga Meta. Sipas tij, arsyeja ishte një video intime e ambasadorit me zyrtaren e  qeverisë Edi Rama.

Reagimi i plotë: 

Presidenti i Republikës Sh.T.Z Ilir Meta u njoh sot nëpërmjet medias me shqetësimin e rëndë të bërë publik nga ambasadori i Delegacionit të Bashkimit Europian në Shqipëri, Sh.T.Z Luigi Soreca, lidhur me përhapjen e qëllimtë dhe dashakeqe të disa lajmeve për gjoja ekzistencën e një video kompromentuese, me qëllim goditjen e pastërtisë së figurës së Tij.

Presidenti Meta duke shprehur solidaritetin e Tij të plotë me ambasadorin e BE, si edhe me një zv/ministre të Qeverisë, e cila mësohet se gjithashtu është përfolur paturpësisht në këtë çështje, bën me dije se shumë shpejt do t’i kërkojë zyrtarisht institucioneve të drejtësisë, Policisë së Shtetit dhe Shërbimit Informativ Shtetëror, të nisin menjëherë hetimet për zbardhjen pa asnjë vonesë të autorëve dhe urdhëruesit të këtij shantazhi të dënueshëm ndaj dy autoriteteve.

Presidenti Meta i bën thirrje gazetarëve të distancohen urgjentisht nga çdo skenar i fabrikimit të lajmeve të rreme me qëllim shantazhimin e Ambasadorit të BE dhe çdo diplomati tjetër në Tiranë.

Presidenti Meta fton median, opinionin publik, dhe në veçanti shoqërinë civile, të solidarizohen dhe të dënojnë këtë shantazh të paprecedent, si dhe të përqëndrohen në denoncimin dhe distancimin nga aktet e rënda të Rilindjes, për kapjen e sistemit të drejtësisë, në veçanti të Gjykatës Kushtetuese, siç ishte rasti më i fundit skandaloz i miratimit të ligjit anti-kushtetues për instalimin e KRYEKÇK-së, vetëm pak orë para mbërritjes në Tiranë të Komisionit të Venecias, të kërkuar nga vetë Kuvendi.

Presidenti Meta do të forcojë edhe më shumë bashkëpunimin e Tij të ngushtë me BE-në, dhe do të kërkojë hetim të përbashkët për situatën tepër të rëndë dhe të patolerueshme në Gjykatën Kushtetuese dhe Gjykatën e Lartë.

Presidenti Meta është i palëkundur në vendosmërinë e Tij për të mbrojtur vlerat europiane, nëpërmjet rivendosjes së besimit dhe integritetit të institucioneve të reja të drejtësisë, me besnikëri të hekurt ndaj Kushtetutës së Republikës së Shqipërisë.

Vetëm në këtë mënyrë do të garantojmë çeljen e negociatave për anëtarësim në BE dhe sundimin e ligjit në vend./ Tiranapost.al. 

http://www.tiranapost.al/luigi-soreca-pse-nuk-reagova-une-per-thashethemin-e-videos-nuk-doja/

http://www.tiranapost.al/romina-kuko-ne-nje-interviste-personale-flet-per-familjen-bashkeshortin-dhe-prape-nje-pergjigje-per-thashethemin-e-vitit/

http://www.tiranapost.al/reagon-zv-ministrja-e-brendshme-romina-kuko-disa-media-po-aludojne-neveritshem-me-foto-nga-takime-pune-me-ambasadorin-soreca/