Vajzat që po tregojnë se cilat janë çantat e këtij sezoni
Një nga postulatet që e dëgjojmë shpesh në modë, është që çanta duhet të jetë proporcionale me trupin, gjatësinë dhe peshën. Është e nevojshme që ajo të mos ngjajë me valixhen e dorës, por as me portofolin.
Si për ironi, trendet e çantave këto dy vitet e fundit kanë qenë që nga ato në minuaturë të Jacquemus e deri tek tote Balenciaga, që ngjanin me çantat ku fusim batanijet e mëdha.
Duket se çantat tote të përditshmërisë, janë ato më të preferuarat. Disa herë edhe ato më të shiturat, që nga njerëzit e zakonshëm e deri tek vipat shqiptarë apo edhe të huaj. Janë apo s’janë në modë, të gjithë e blejmë nga një tote! Përshembull, Ashley Graham, supermodelja nga Nebraska, tregon për Vogue se së fundmi pasi është bërë mami, nuk del dot nga shtëpia pa një çantë të madhe. Ato i japin hapësirën e nevojshme dhe komoditetin e të pasurit me vete çdo gjë që i duhet.
Edhe vajzat shqiptare të showbizit dhe modës bien dakort me Ashley-n. Sidomos kur të duhet të udhëtosh, si Alketa Vejsiu, e cila ka zgjedhur çantën Chanel lëkurë “Lambskin”me rripa floriri. Duket casual por dhe me stil. Jam e sigurt që ndjehet komode me gjithë veshjen.
Edhe Armina Mevlani i beson firmës Chanel kur vjen puna tek çantat cilësore. Ky është versioni “Lambskin jumbo single flap” i Chanel, është pak më i madh se versioni origjinal, dizenjuar për veshjet e përditshmërisë.
Jonida Maliqi ka zgjedhur po ashtu çantat e mëdha, tote ose jo. Çantën kuq e zi ka kombinuar me kombinoshe xhins, e gjysëm çizme të bardha. Ndërsa versionin e zi të Celine e ka mbajtur një paradite me diell, veshur krejt me të zeza.