Opinion

Po të kisha të drejtë vote do ishte për Trump-in

Stela Sallaku ndodhet në Amerikë. Gazetarja jonë e modës ka sjellë një shënim pas kuriozitetit tonë për zgjedhjet historike për president në SHBA. Ndryshe nga Instagrami që thërret anti Trump, ka një Amerikë tjetër, dhe disa nga arsyet pse brenda Amerikës e duan Trump na i ka sjellë Stela. Ajo s`mund të votojë, por halla e saj që jeton atje, po, dhe për Trumpi-n sepse... ah ka disa pse-ra!

Po të kisha të drejtë vote do ishte për Trump-in

Nga Stela Sallaku/ Nuk kam asnjë drojë ta pranoj se janarin e shkuar presidentin Trump e njihja vetëm si emër. Më shumë informacion kisha për veshjet e Melanias, se sa për vetë presidentin. Donald Trump nuk shquhet për modë, dhe as për ndonjë shije të veçantë në zgjedhjen e veshjeve. Por sa i takon biznesit, sipërmarrjes dhe shifrave thonë se është shumë i zoti.

Sapo erdha në Amerikë, fillova të mësohem me faktin që çdo diskutim përfshinte dhe presidentin brenda. Dukej sikur përveç meje, të gjithë e kishin nga një mendim për të. Disa thoshin se i duket kapsja e parukes kur flet, të tjerë thoshin se i ka vënë të gjithë amerikanët në punë, saqë papunësia para pandemisë ishte reduktuar në 3.5%. Disa mendonin se e ka kthyer shtetin në strukturë biznesi, por vetë bizneset ishin kënaqur me taksat e reja.

Disa thoshin se është racist, nuk do as meksikanët, e as emigrantët nga zonat me preardhje myslimane. Dhe ajo puna e murit nuk ka dalë kot. Po ta kapë inati me ndonjë personazh publik, i qëndis ndonjë status në Twitter.

Donald J. Trump është njujorkez puro. Madje i plotëson të gjitha kriteret për t’u quajtur i tillë. Lindur në Queens, New York, madje.

Tiparet e një njujorkezi të vërtetë:                                                      

* -           Sjellje dyshuese kundrejt gjithçkaje dhe çdokujt

* -           Nuk shquhen për durim

* -           Një mungesë dëshire për t’i dhënë makinës

* -           Sikur nuk gjejnë rehati asnjëherë

* -           Duan më shumë qentë se sa njerëzit

* -           Gjuhën e australianëve as që e kuptojnë fare

* -           Kanë parë hata me sy nëpër trena dhe s’ju bën më përshtypje asnjë gjë

* -           Etj.

Presidenti i 45-të i Amerikës duket se i gëzon këto veti, të paktën shumicën. Është rritur në një familje ku i ati është marrë me real estate që herët. Pasuria e tij thuhet se shkon në 1 miliard dollarë. Vetë Donald Trump është emëruar CEO i kompanisë të së atit në 1971, me pak fjalë i është besuar drejtimi dhe menaxhimi i njerëzve dhe situatave të paparashikuara të biznesit. Kushdo që ka pasur biznes, e di mirë se ku e kam fjalën. Mua më është dukur gjithnjë edhe shteti një biznes i madh, veçse me një numër shumë më të madh punonjësish. Çfarë thotë njëri s`e thotë tjetri, e çfarë i pëlqen njërit jo domosdo do t’i pëlqejë tjetrit. Të gjithë duan vende pune e kushte të barabarta. Drejtuesit duhet të gjejnë gjuhën e përbashkët si dhe të krijojnë ambient të sigurt pune për secilin. Më vjen në mend puna ime e parë! Sa pak menaxhim kishte! Secili bënte si të donte. Hiqeshin dhe viheshin njerëzit në punë sipas interesit!

Shumica e rezidentëve në Texas votojnë Trump-in, ose partinë Republikane. Kandidati i krahut të majtë nuk duket shumë i besuar sa i takon drejtimit. Por jo vetëm Texas, kur isha në Wyoming kam parë gra e burra me bluza me logon “Voto Trump”. Shumica e banorëve qenë Republikanë, por ka dhe disa Demokratë që numërohen me gishta. Edhe në Montana, edhe në Ohio, edhe në Nebraska.

Edhe halla ime do votojë Trump-in. Zakonisht nuk bën kurrë komente për votën e saj, por unë kisha kuriozitet të tepruar. Pse-të dhe ç’ne-të nuk ia kam kursyer çdo mëngjes kur pinim kafet. Ndoshta u binda nga pikëpamjet e Trump, sidomos politikat e tij menaxheriale. Ndoshta, ndoshta Joe Biden s’më pëlqen më shumë se Trump. Ndoshta, si sipërmarrëse që në moshën 23-vjeçare i simpatizoj sipërmarrësit më shumë se sa të tjerët. Nuk e di pse, por po të kisha të drejtë vote, e di me siguri që do votoja Donald Trump-in.