Çfarë tha Kryeministri pikë për presje për akuzat në lidhje me ish-kreun e FBI
E Mërkurë 25 Janar 2023, 19:58
TiranaPost
Tema e 48 orëve të fundit ka qenë rasti i ish-kreut të FBI nën hetim në SHBA për bashkëpunimin me një oligark rus, si dhe disa takime përfshi një deklaratë të Kryeministrit ku e konsideronte mik duke përdorur frazën “friendly relationship”, kanë ndezur mediat.
Sot Kryeministri pas takimit me drejtuesit e PS në qarqe iu është përgjigjur pyetjeve të gazetarëve në ambientet e Partisë Socialiste.
Më poshtë e gjeni të plotë komunikimin për këtë çështje:
- Zoti Rama, keni një përgjigje për akuzat e opozitës, sa i takon lidhjes suaj me ish zyrtarin e FBI-së, të arrestuar në SHBA?
Edi Rama: Besoj që njerëzit normalisht duhet të jenë mësuar që këtu opinioni ndahet në një pjesë që beson me doemos atë që do të besojë dhe një pjesë tjetër që dëgjon dhe reflekton mbi faktet.
Kjo është një çështje joçështje sepse është një çështje e hetuar nga drejtësia amerikane, e cila nuk nxjerr vendime për vrasje pa autorë apo vrasje nga pakujdesia kur vrasjet bëhen nga dritaret e institucioneve shtetërore dhe nuk ia përton, siç e keni parë, askujt.
Në rastin konkret, ka zero akuzë dhe zero lidhje mes çështjes që diskutohet dhe meje apo qeverisë së Republikës së Shqipërisë.
- Emri juaj përmendet në atë akuzë 14 herë dhe gjithashtu ka 4 takime tuajat me ish zyrtarin e FBI-së. Çfarë keni diskutuar me këtë ish zyrtar ju, në prani dhe të njerëzve të tretë; ka qenë një ish agjent i Inteligjencës shqiptare dhe një person i cili punon për kompani kineze por përdor e-mailin e shtetit shqiptar. Çfarë është diskutuar në këto takime?
Edi Rama: Këto janë derivate të keq leximit të këtushëm, përmendja e emrit si pjesë në një takim apo në një takim tjetër nuk ka asnjë lidhje me përfundimet që ka nxjerrë hetimi në Shtetet e Bashkuara. Në Shtetet e Bashkuara është bërë një hetim dhe janë nxjerrë përfundime dhe në përfundimet e hetimit të Shteteve të Bashkuara nuk ka absolutisht asnjë lidhje me të gjitha këto që thoni ju. “Takove një zyrtar të lartë të FBI-së?” “Po, e takova.” “Takove një zyrtar të lartë të FBI-së disa herë?” “Po, e takova”.
Kjo nuk përbën asnjë arsye për të nxjerrë konkluzione të reja duke parë nga Tirana me dylbitë e politikës së qorollepsjes së njerëzve dhe të zhurmës për zhurmë, aq më tepër në kushtet kur jemi përpara një fakti të ri dhe tronditës për 21 janarin dhe kërkesës së ministrit të Drejtësisë dhe partisë Socialiste për të hapur hetimin në Prokurorinë e Posaçme dhe kush do të kuptojë e kupton se unë nuk mund të komentoj asgjënë, të komentoj mbi komente është e kotë.
Unë dhe qeveria e Republikës së Shqipërisë nuk kanë asnjë lidhje me përfundimin e hetimit për një çështje dytësore të dalë rrugës, ndërkohë që çështja kryesore është një çështje krejt tjetër lidhur me akuzën që i është ngritur zyrtarit të FBI-së.
- Gjithashtu në aktakuzë përmendet fakti që informacioni ka dalë nga zyra e kryeministrit, pra është një person i cili ka gjetur këtë informacion për të nisur një hetim për lobimin e opozitës.
Edi Rama: Edhe njëherë tjetër. Përfundimet e hetimit dhe fillimi i fazës tjetër të procesit ku hetuesit amerikanë kanë dorëzuar dosjen e hetimit të tyre nuk ka asgjë nga ato që thoni ju, absolutisht asnjë konkluzion. Përmendjet lexojini mirë sepse aty nuk përmendet absolutisht një gjë e tillë; aty thuhet se çfarë thotë njëri dhe çfarë thotë tjetri ndërkohë që vetë hetuesit thonë një gjë tjetër; që hetimet kanë përfunduar, ka një të akuzuar për mosdeklarim dhe konflikt interesi në raport me shokun e tij shqiptaro-amerikan nga Tropoja, të cilin unë e kam njohur në takimin me të dhe me të cilin nuk kam pasur asnjë lloj lidhje tjetër përveç këtij raporti miqësor dhe këtyre shkëmbimeve krejtësisht pa asnjë interes tjetër me zyrtarin e lartë të FBI-së.
- Zoti kryeministër, pse zoti Agron Meza dhe Dorian Ducka nuk kanë punuar ndonjëherë për ju as në vitin 2017-2018?
Edi Rama: Fola për zotin Agron, i cili e përsëris, vjen nga Lëvizja Demokratike, shumë i afërt i të ndjerit Azem Hajdari, fis me Besnik Mustafain, njerëz të nderuar padiskutim, të cilin nuk e kam njohur më parë asnjëherë dhe me të cilin nuk kam shkëmbyer as letra, as interesa dhe asnjë gjë tjetër por e kam takuar vetëm në praninë e zyrtarit të lartë të FBI-së.
Përsa i përket personit tjetër, ka qenë zëvendës ministër i Energjetikës në koalicionin e vitit 2013 dhe pastaj për njëfarë kohe ka punuar pranë meje pa pagesë.
- Zoti Rama, atëherë pse opozita po e përdor një hetim në Shtetet e Bashkuara kundër jush?
Edi Rama: Ah, pse opozita po e përdor një hetim të Shteteve të Bashkuara kundër nesh apo kundër meje; unë jam mësuar me këto. Unë realisht jam i ngopur dhe mbingopur me të tilla historira që synojnë vetëm qorrollepsjen e njerëzve dhe krijimin e një klime agresiviteti, ndasie, gjysmë të vërtetash që janë gënjeshtrat më të mëdha dhe më mirë të shpenzoj më shumë kohë nga koha që i kam dhënë nxjerrjes së përditshme të këtyre gurëve që hidhen në lumë dhe pastaj “Hajde t’i nxjerrim që t’i shpjegojmë dhe t’i sqarojmë” për të bërë më shumë punë për njerëzit, për të zgjidhur më shumë halle për njerëzit, natyrisht pa shkëputur komunikimin por siç e keni parë, jam shumë i fokusuar tek punët e përditshme konkrete sesa tek komunikimi sepse realisht është një klimë Big Brotheri politik dhe mediatik ku askush nuk pyet për asgjë, të gjithë i gjëmojnë lajmeve sensacionale, pa marrë parasysh a janë të vërteta, i gjëmojnë “like”-ve, i gjëmojnë “share”-ve. Nuk kam asnjë ankesë për të tjerët.
- Si u bëtë mik ju me agjentin e FBI-së?
Edi Rama: E para punës, fjala mik është një fjalë shumë e madhe, unë kam folur në gjuhën angleze për natyrën e marrëdhënies dhe kam thënë “Friendly relation”, një raport miqësor. Në këtë sens kam thënë “Po, ka qenë një mik”, por jo mik në kuptimin që kam ndarë me të jetën për shumë vite. E kam takuar disa herë, e kam takuar në zyrën më të rëndësishme të FBI-së në Shtetet e Bashkuara të Amerikës, në zyrën e New York ku më ka prezantuar dhe kolegë të tjerë, ku më ka dhënë dhe nga ato dhuratat, kapele e medalje që në Big Brotherin politik u shfaqën si aparatura përgjimi dhe ka ardhur në Shqipëri, jemi takuar. Interesi im ka qenë që të shkëmbej biseda, opinione lidhur me ato fusha të cilat ai ishte një ekspert i nivelit të lartë, krimi, korrupsioni, Amerika, Ballkani, Shqipëria.
- A ka dijeni ambasada amerikanë që ju keni zhvilluar takime me zyrtarë të FBI?
Edi Rama: Për çfarë duhet të ketë dijeni ambasada amerikane? Unë nuk lajmëroj ambasadën amerikane kur takoj amerikanë. Janë amerikanët që lajmërojnë ose nuk lajmërojnë ambasadën.
- Zoti Rama, pse kryeministri i Shqipërisë duhet të takojë një agjent të FBI-së në prani të personave të tjerë që nuk janë pjesë të qeverisë?
Edi Rama: Kam takuar një ndër zyrtarët më të lartë të FBI dhe çdo zyrtar të lartë të FBI-së do ta takoja përsëri, sa herë të më jepej mundësia sepse unë kam takuar dhe presidentin e Shteteve të Bashkuara dhe fakti se presidenti i Shteteve të Bashkuara ishte apo mund të jetë në hetim kjo nuk ka lidhje me mua apo me këdo qoftë që ne takojmë por ne jetojmë në një zonë të botës ku njerëz merren me “Kë takove, kujt i fole, kujt nuk i fole”, por jo çfarë fole ose çfarë të tha e çfarë i the. Kështu që e kam takuar dhe kam bërë shumë mirë që e kam takuar dhe s’kam absolutisht asnjë problem me këtë dhe ndërkohë gjithë kjo është një absurd. Dhe më vjen keq për ju por s'ju vë faj sigurisht sepse ju jeni pjesë e ndërmarrjeve që përfaqësoni.
Në akt padinë konkluzive të drejtësisë amerikane nuk ka absolutisht asnjë gjë që lidhet me mua apo me qeverinë përveç fakteve: u takua këtu, u takua atje.
- Takimet në akt padinë thuhet që janë shoqëruar dhe me fatura.
Edi Rama: Në çfarë gjuhe e keni lexuar këtë?
- Në anglisht
Edi Rama: Mësoni më mirë anglisht.
- Duke qenë se ju thoni që nuk ka asnjë shqetësim për këtë çështje, a do lejoni një hetim parlamentar, një komision parlamentar?
Edi Rama: Jo s'kam unë asnjë shqetësim për këtë çështje. Jo s'kam unë. Drejtësia amerikane e cila e ka hetuar tërësisht dhe që ka dalë në konkluzione dhe ka dalë në akuzë për personin dhe në rastin konkret ai ka ne këtë rast akuzë për konflikt interesi në marrjen e një borxhi nga shoku i tij shqiptaro amerikan nga Tropoja që jetojnë bashkë në New York
- I cili ka darkuar bashkë me ju, kanë darkuar të gjithë pak kohe pasi janë bërë pagesat.
Edi Rama: Unë kam darkuar edhe me një person non grata këtu në Shqipëri. Kam darkuar në Strasburg me një njeri që është i shpallur non grata dhe po pastaj çfarë do të thotë kjo që "kam darkuar", çfarë janë këto muhabete?
- Do lejoni komision hetimor për këtë çështje?
Edi Rama: Për çfarë?
-Të hetohet kjo çështje.
Edi Rama: Të hetohet cila çështje? Kjo çështje është hetuar nga drejtësia amerikane dhe kanë dalë konkluzionet. Çfarë do hetohet këtu? Do hetohen fantazitë e shfrenuara të një lidershipi që ka bastarduar çdo lloj raporti me të vërtetën dhe çdo lloj raporti me publikun? Kjo nuk është një çështje e parlamentit të Shqipërisë.
- Te hetohet nëse ka pasur gisht mazhoranca në kërkesën e hetimit për lobimin e opozitës.
Edi Rama: Ka një drejtësi në Amerikë fatmirësisht dhe ka gjykata në Amerikë kështu që nëse ju thoni që drejtësia amerikane, gjykatat në Amerikë mund te kontestohen nga vetëgjyqësia e foltores apo e vulës bashkë me foltoren apo tjetrit e tjetrit, kjo është zgjedhja juaj. Nuk është zgjedhja ime. Unë nuk kam asnjë replikë, asnjë polemikë për të bërë. Unë iu them njerëzve ku eshtë pasqyra e të vërtetës sipas drejtësisë amerikane pastaj ata zgjedhin cilën nga pasqyrat tuaja të shohin, të ndjekin, të dëgjojnë edhe madje njerëzit zgjedhin edhe të besojnë që një oligark i madh rus ka ardhur në Karavasta për te bërë fitime me shegë dhe me luleshtrydhe!
