Politikë

Kryeministri ju thotë gazetarëve: Jeni të lirë edhe të shpifni, por mos prisni që kur vini të më pyesni mua t’jua lejoj

Kryeministri ju thotë gazetarëve: Jeni të lirë edhe të

Kryeministri Edi Rama ka reaguar sërish në lidhje me përjashtimin e gazetarit Klevi Muka nga konferencat e tij për tre muaj me radhë. Kreu i qeverisë në një postim në Twitter iu drejtohet gazetarëve duke thënë se liria e shkeljes së normave etike nuk mund lëjohet brenda në konferencat e tij për shtyp.

Ndërkaq, gazetarët kanë paralajmëruar protestë përballë kryeministrisë më 4 korrik.

"E përshëndes si shprehje lirie sulmin e disave,që në emër të lirisë së medias kërkojnë legjitimim për lirinë e shkeljes së normave etike deri brenda konferencave të mia për shtyp, sepse jashtë tyre tanimë kjo liri është e legjitimuar plotësisht! Por kërkesa s'mund të plotësohet.

Jemi tërhequr nga përpjekja për ta normuar ligjërisht lirinë e shpifjes dhe të fyerjes, që në epokën e rrjeteve sociale ka marrë përmasa katastrofike! Nuk e kemi bërë as nga frika, as nga presionet po si reagim konstruktiv ndaj kërkesës së komunitetit mediatik për vetërregullim.

Ku është vetërregullimi? Nejse,do ta presim pa shpresë se do vijë! Por ndërkohë nuk ka për të ndodhur që të legjitimohet liria e shkeljes së normave etike sy më sy në praninë time. E kam ndryshuar ka kohë qasjen time, jo se janë zhdukur kazanët po se kam reaguar ndaj kritikave.

Por ja që asgjë s'ka ndryshuar nga ana tjetër, përkundrazi, megjithëse asnjë gazetari e asnjë medieje nuk i ka hyrë asnjë gjemb në këmbë nga kjo qeveri dhe megjithëse disponimi ndaj pyetjeve e kërkesave për informacion ka qenë maksimal, janë shtuar shpifjet e është ulur rankimi!

Si përfundim: Shpifni,gënjeni,sajoni,shkruajeni e fliteni shqipen keq sa të doni, sepse askush nuk do t'ju thotë "plaç",po mos prisni që dhe kur vini për të pyetur mua të ushtroni publikisht në mënyrë të përsëritur lirinë e shkeljes së etikës dhe përsëri të jeni të mirëseardhur!", shkruan Rama