Politikë

Kuvendi 'shtyn' orarin e mbledhjes së Këshillit Politik për Zgjedhoren

Kuvendi 'shtyn' orarin e mbledhjes së Këshillit Politik

Seanca plenare që do të mbahet ditën e nesërme ka bërë që mbledhja e Këshillit Politik për Reformën Zgjedhore të shtyhet në orar.  Për shkak të orarit që shkakton përplasje me dy ngjarje me rëndësi, mbledhja e Këshillit Politik do të mbahet në  orën 17:00 të pasdites së nesërme.

Ndërsa Kuvendi do të mbahet gjatë paradites ku deputetët e opozitës së re kanë kërkuar interpelancë me kryeministrin për çështjen e Teatrit.

Mbledhja e djeshme mes palëve politike për reformën Zgjedhore arriti në dakordësi në tre çështje, konkretisht:

1. Financimi i partive

Ligji i propozuar nga opozita forcon rregullat e transparencës, verifikimit të financimit dhe sanksionet. Një ndër propozimet e opozitës është edhe përjashtimi i privatëve që financojnë partitë politike nga tenderat, koncesionet dhe kontratat publike. Në këtë mënyrë eleminohet mundësia e favorizimit të tyre të paligjshëm.
Opozita propozon që financimi nga privati të jetë sa gjysma e financimit nga shteti. Aktualisht, partitë lejohen të shpenzojnë sa 10 herë shuma e financimit publik. Psh. Kur ajo merr nga buxheti 30 milionë lekë, financimi privat do të jetë 15 milionë lekë dhe jo 300 milionë, siç është aktialisht. Ligji shton mekanizmat shtetërorë e kontrollit të shpenzimeve në fushatë, me qëllim eleminimin e përdorimit të parave të pista në zgjedhje. Propozimi është në përputhje me rekomandimet ndërkombëtare.

2. Kuota gjinore

Në mënyrë që të zbatohet realisht përfaqësimi në lista të jo më pak se 30% gra dhe 1 ndër 3 emrat e parë të listës të jetë grua, opozita propozon që partitë apo koalicionet të kenë aq kandidatë sa numri i mandateve në qark. Asnje kandidat më shumë të mos pranohet. Aktualisht, lista e pakufizuar dhe vendosja e grave në fund të listës e bën joefektive kuotën 30%. Sanksioni për shkeljen e kuotës gjinore nuk është më gjoba, por refuzimi i regjistrimit të listës për qarkun përkatës.

3. Periudha zgjedhore

Opozita kërkon shkurtimin e periudhës zgjedhore në të dy sezonet e parashikuar aktualë. Nga 3 muaj kërkohet që të bëhet 1 muaj. Opozita propozon që zgjedhjet të mos zhvillohen në periudha që ndikojnë në sezonin turistik, por t’u jepet qytetarëve çdo mundësi për të ushtruar të drejtën e votës. Periudhat e zgjedhjeve të propozuara nga opozita janë 15 Prill-15 Maj dhe 15 Tetor – 15 Nëntor.

Palët kanë rëndë dakord që reformat të mbyllet me datë 31 maj.