Politikë

PS hap me Tiranën procesin për zgjedhjen e kryetarëve të rinj, Rama: Çdo anëtar mund të garojë

PS hap me Tiranën procesin për zgjedhjen e kryetarëve të

Partia Socialiste ka hapur sot procesin për zgjedhjen e kryetarëve të rinj të partisë në të gjitha bashkitë.

Hapja e procesit ka nisur nga Qarku i Tiranës, ku janë ftuar të gjithë anëtarët e PS-së të cilët duan të marrin përsipër angazhime brenda partisë që të paraqesin kandidaturat e tyre.

Në fjalën e tij kryeministri Edi Rama, njëherësh kryetar i PS-së e cilësoi përzgjedhjen e kryetarëve të rinj të partisë në 61 Bashkitë si mjaft të rëndësishëm.

“Është një proces i cili është përmbajtësisht i ri dhe është e domosdoshme që ne të bëjmë të gjithë përpjekjen që askush të mos ketë ndroje të përfshihet nëse do të përfshihet, për shkak të paragjykimit se procesi mund të mos jetë tërësisht i hapur dhe tërësisht konkurrues. Në fakt qëllimi është ky që procesi të jetë i hapur dhe konkurrues.

Por nga e thëna në të bërë edhe këtu ka në mes një det të tërë.

E vërteta është se të kaluarën kemi patur më shumë se një rast dhe më pas proceset janë mbyllur dhe kanë degraduar në riciklimin e të njëjtës gjë. Për këtë arsye në Kongresin e Partisë ne morën një vendim duke ndjekur një diskutim të lindur në Asamble që ta fillojmë procesin me zgjedhjen e kryetarëve në 61 bashkitë dhe pastaj në të gjitha njësitë administrative për ta patur këtë si fazën e parë dhe për të shkuar pastaj tek organizatat ku zgjedhjet nuk janë zhvilluar, apo ku zgjedhjet janë zhvilluar pa përmbushur kriteret e vendosura për përbërjen e organizatës dhe të gjitha ato që janë parashikuar në Asamblenë Kombëtarë”, tha Rama.