Rajoni

Mesazhi i Amerikës në 1-vjetorin e marrëveshjes Kosovë-Serbi

Mesazhi i Amerikës në 1-vjetorin e marrëveshjes Kosovë-Serbi

Një ditë përpara marrëveshjes së 4 shtatorit të nënshkruan në Uashington në mes të Kosovës dhe Serbisë, vitin e kaluar, Departamenti Amerikan i Shtetit ka bërë thirrje që gjithçka e nënshkruar, të respektohet.

“Ne jemi duke vazhduar punën me Kosovë dhe Serbinë për zbatimin e angazhimeve që kanë marrë në mbështetje të qëllimit për normalizim gjithëpërfshirës të marrëdhënieve. Shtetet e Bashkuara janë të gatshme për ta mbështetur punën drejt marrëveshjes gjithëpërfshirëse dhe detyruese në mes të Kosovës dhe Serbisë, me bazë njohjen reciproke e cila vendos themelet për bashkëpunim dhe mirëqenie afatgjatë”, është shprehur zëdhënësi i DASH, Ned Rice për Klan Kosova.

“Ne mbështesim dialogun e ndërmjetësuar nga Bashkimi Evropian dhe nxisim palët që të riangazhohen në këtë proces me një ndjenjë urgjence për të trajtuar çështje politike dhe teknike.

Shpresojmë që partnerët tanë do të respektojnë me mirëbesim angazhimet e marra në Uashington vitin e kaluar. Prandaj ne inkurajojmë të dyja palët për të prioritizuar përpjekjet për të ndërtuar besim politike përmes pjesëmarrjen serioze dhe të domosdoshme në procesin e dialogut të lehtësuar nga BE”, shton Rice.

Një pikë e marrëveshjes së arritur një vit më parë, është moratoriumit sa i përket “njohje-ç’njohjeve”, nënshkruar nga Avdullah Hoti si kryeministër i Kosovës dhe Aleksandër Vuçiq, president i Serbisë dhe ndërmjetësuar nga Donald Trump President i SHBA-së, në 2020-ën.

DASH u bën thirrje të dyja palëve që të jenë të kujdesshme në këtë pikë.

“Ne gjithashtu nxisim Kosovën dhe Serbinë që ta rrisin bashkëpunimin në fusha me interes të përbashkët, sikurse rimëkëmbja lidhur me pandeminë dhe përmirësimin e marrëdhënieve ekonomike dhe tregtare. Në mënyrë që të mbështetet dhe të ketë suksese dialogu dhe përpjekjet tjera, inkurajojmë të dyja palët që të ruajnë moratoriumet e tyre në çështjen e njohjes që ndërlikojnë përparimin në fushat teknike”, shprehet Rice nga DASH.