Vuçiç fajëson Kurtin për dështimin e marrëveshjes dhe zbulon 6 pikat e propozuara nga Prishtina
E Diel 21 Gusht 2022, 19:44
TiranaPost
Për herë të parë pas dështimit të bisedimeve më 18 gusht në Bruksel, në kuadër të dialogut të ndërmjetësuar nga Bashkimi Europian, ka folur Presidenti serb Aleksandar Vuçiç, i cili ka fajësuar Kryeministrin e Kosovës, Albin Kurti, për mos arritjen e një marrëveshjeje.
Vuçiç i cili ka takuar ditën e sotme dhe përfaqësuesit e serbëve nga Kosova, tha se në këto bisedime Prishtina ka refuzuar çdo propozim për targat dhe dokumentet serbe.
“Atyre nuk u intereson ta zbatojnë atë. Ata refuzuan dhe targat KS dhe gjithçka, sepse i vetmi qëllim i tyre është ai i torturimit të popullit tonë në Kosovë, dëbimi përfundimtar i tyre”.
“Nuk do të ekzistojnë kolonat e refugjatëve, sepse ne do të shpëtojmë popullin tonë nga persekutimi,” shtoi Vuçiç.
Presidenti serb Aleksandar Vuçiç tregoi dhe 6 pikat e marrëveshjes propozuar nga Prishtina:
1. Njohja reciproke dhe anëtarësimi në të gjitha organizatat ndërkombëtare
2. Zgjidhja e problemeve nga e kaluara: zgjidhja e problemit të të pagjeturve, konstatimi dhe zgjidhja e problemit të personave të përdhunuar, të të zhvendosurve, shkatërrimi i pronës private dhe publike dhe kthimi i objekteve, dëmshpërblimet e luftës që Serbia duhet t’i paguajë të gjitha
3. Bashkëpunimi në të ardhmen
4. Respektim reciprok për të drejtat e serbëve në Kosovë dhe shqiptarëve në Luginën e Preshevës
5. Rishqyrtimi i marrëveshjeve të dakordësuara më parë, zgjidhja e mosmarrëveshjeve
6. Dispozitat përfundimtare
