Nxënësit nuk do të bëjnë më orë bosh kur mësuesit mungojnë
E Martë 13 Qershor 2023, 16:21
TiranaPost
Disa ndryshime të reja do të ketë në sistemin arsimor. Prezantimin e tyre e bëri ministrja e Arsimit në mbledhjen e Komisionit për Edukimin dhe Mjetet e Informimit Publik.
Më interesantja është ajo e ngritjes së një strukture në çdo ZVA (Zyrë Vendore Arsimore) për krijimin e një rrjeti mësuesish zëvendësues. Nëse një mësues mungon diku në një shkollë, një tjetër do të shkojë zëvendësues ditor. Kështu shmangen orët bosh në sistemin parauniversitar, por edhe mundësohet realizimi i plotë i orëve.
Pikat që do të ndryshohen:
• E drejta e regjistrimit në klasë të parë për fëmijët që mbushin moshën 6 vjeç deri më datën 31 dhjetor të atij viti, me kërkesë të prindërve;
• Dhënia e statusit të veçantë për shkollat e arsimit të orientuar, si dhe arsimimi dhe promovimi i talenteve në arsimin bazë, jo vetëm në shkollat e orientuara, por edhe në shkollat normale përmes klasave të orientuara;
• Ngritja e një strukture në çdo ZVA për mësuesit në dispozicion, të cilët do t’u vijnë në ndihmë shkollave për nevojat e tyre kur ka mungesa të mësuesve;
• Përcaktimi i qartë i përgjegjësive për monitorimin, vlerësimin dhe inspektimin e institucioneve arsimore;
• Rregullimi ligjor i institucioneve plotësuese private që ofrojnë shërbime për nxënësit pas orarit mësimor.
