SPORT

4 gola në “Nikova Dovana”, Teuta dhe Kukësi ndajnë pikët

4 gola në “Nikova Dovana”, Teuta dhe Kukësi ndajnë

Në “Niko Dovana” nuk ka fitues, me Teutën dhe Kukësin që dhurojnë një sfidë spektakolare mes tyre me një barazim 2-2, ku durrsakët flirtuan shumë me fitoren, duke qenë dy herë në epërsi, ndërsa në fund goditën shtyllën me Vilën (93’). Teuta frenohet nga Kukësi pas tri fitoreve, me skuadrën verilindore që pavarësisht barazimit shikon Europën të largohet nga kampionati. Dejvi Bregu nuk mjaftoi për “Djemtë e Detit, pasi Eze dhe Tsindzatse me golin e parë në kampionat frenuan Teutën.
Teuta më kërkuese në këto minuta të para. Bregu humb një rast të shkëlqyer (13’), duke e gjuajtur topin mbi traun e portës, pas një krosimi të Emiljano Vilës.
Tjetër rasti i mirë për Teutën (21’), Emiljano Vila jep një top të shkëlqyer për Bregun, i cili provon me një gjuajtje, por Dragoshi bllokon.
Karabeci tentoi të surprizonte në të 22-tën Kukësin, teksa lëshoi një gjuajtje të bukur me të majtën nga jashtë zone, por Xhika ishte i vëmendshëm dhe largoi topin në goditje këndi.
Vjen rreziku i parë nga Kukësi (30’)! Leira lëviz bukur dhe futet në zonë, teksa provon me një gjuajtje me të majtën, por Frashëri e ndal në momentin e fundit.
Penallti për Teutën në të 33-tën! Dragoshi bën ndërhyrje të gabuar ndaj Bregut dhe arbitri akordon penallti, pavarësisht se në vazhdim të aksionit Karabeci shënoi.
Dejvi Bregu në të 35-tën, i jep avantazhin ekipit të tij nga pika e bardhë e penalltisë, duke e dërguar topin në krahun e kundërt të portierit.
Agim Ibraimi kroson drejt zonës në të 58-tën me anë të një goditje dënimi, duke qenë i rrezikshëm, pasi topi kaloi pranë shtyllës së dytë të portës së Frashërit.
Në të 69-tën penallti për Kukësin. Protestojnë lojtarët e Teutës pas ndërhyrjes së Aleksit, që u konsiderua e parregullt nga kryesori. Eze tregohet i saktë nga pika e bardhë, 1-1. Vetëm dy minuta më vonë Dejvi Bregu ekzekutoi saktësisht një goditje të lirë, duke kthyer shumë shpejt epërsinë për Teutën.
Kukësi, gjithsesi ia doli të barazonte me Tsintzadsen në të 87-ën, duke shënuar në ndeshjen e tij të parë si titullar.
Në fund një pikë që nuk i vlen askujt, me Teutën që mund t’i ketë dhënë një mundësi Vllaznisë për t’u larguar, ndërsa Kukësi e ka gjithmonë e më të vështirë arritjen e Europës nga kampionati.