As Barcelonën, as sauditët, Messi zgjedh Interin amerikan
E Mërkurë 7 Qershor 2023, 20:27
TiranaPost
Leo Messi pritet të transferohet tek Inter Miami në kampionatin MLS.
Mediat spanjolle bëjnë të ditur se Messi ka marrë vendimin të shkojë në klubin e David Beckham.
Sipas "Marca", Messi u tërhoq nga opsioni i kthimit në Barcelonë. Klubi i tha se regjistrimi i tij është i mundur, por do të duhet kohë. Por Messi nuk donte të priste.
Ylli argjentinas kishte një ofertë edhe nga Al-Hilal. Klubi saudit i ofroi shumë para futbollistit 35-vjeçar, por nga pikëpamja sportive oferta për të nuk ishte aq interesante.
Messi zgjodhi përfundimisht Inter Miami, ku presioni mbi të nuk do të jetë aq i fortë sa në Europë. Në Miami, shumë njerëz flasin spanjisht, gjë që e tërhoqi edhe më shumë sportistin.
Marrëveshja e cila mundëson kalimin e Messit te Inter Miami thuhet se përfshin kontribute nga dy prej partnerëve më të mëdhenj tregtarë të MLS, AppleTV, mbajtësi aktual i të drejtave të transmetimit dhe Adidas, sponsori i kampionatit amerikan.
MLS dhe Apple thuhet se kanë diskutuar t’i ofrojnë Messit një pjesë të të ardhurave të krijuara nga transmetuesit e rinj. Apple po punon gjithashtu në një dokumentar me katër pjesë që rrëfen katër paraqitjet e Messit në Kupën e Botës. Ndërkohë Adidas thuhet se po i ofron argjentinasit një marrëveshje për ndarjen e fitimit me gjigandin e veshjeve sportive.
Ka gjithashtu zëra se Messi do të ketë të njëjtin opsion në kontratën e tij që e lejon argjentinasin të blejë aksione në një klub në MLS me një çmim të paracaktuar.
