Cikalleshi i jep lamtumirën Kombëtares pasi u la jashtë Europianit
E Martë 28 Maj 2024, 15:19
TiranaPost
Sokol Çikalleshi ka marrë vendimin për t’u tërhequr nga kombëtarja e Shqipërisë, një ditë pasi Sylvinho mori vendimin për ta lënë jashtë Evropianit, i cili nis në 14 qershor.
Me anë të një postimi në Instagram sulmuesi 34-vjeçar falënderon të gjithë për vitet që ka përfaqësuar Kombëtaren dhe i uron suksese në Euro 2024.
“Fundi i një rrugëtimi. Rrugëtimet janë të bukura, me uljet e ngritjet e veta. Gjatë rrugëtimeve, nëse gjërat i ke bërë siç duhet, fundit është i lumtur, paçka se jo gjithmonë e zgjedhim vetë. Ka qenë një krenari dhe emocion i papërshkrueshëm përfaqësimi i fanellës së ekipit kombëtar të futbollit. Bartja e emocioneve të një kombi mbi shpinë, është sa privilegj ashtu edhe përgjegjësi, e cila më ka bërë të përulur dhe mirënjohës ndaj çdokujt që besoi, ndaj çdokujt që më dha kurajo për të vazhduar, e padyshim në mënyrë të veçantë çdo kujt që brohoriti për mua.
Ashtu siç, çdo fillim e ka një fund, edhe rrugëtimit tim me ekipin kombëtar të futbollit i erdhi fundi! Ndihem i lumtur për çka bëra gjatë këtij rrugëtimi, ku dhashë pa kursimin më të vogël pikën e fundit të djersës dhe shpirtin për të bërë më të mirën e mundshme
Falenderoj Zotin për gjithçka më ka dhënë në jetë, familjen për mbështetjen, tifozët Kuq e Zi që meritojnë shumë më shumë sesa ne kemi dhënë në fushën e blertë. Lutem Zotit që shokët që do vijojnë rrugëtimin në Euro2024 të kenë sukses dhe të bëjnë një paraqitje dinjitoze”, shkruan Cikalleshi.
