Njeriu më i vjetër në botë, sekreti i të cilës ishte shmangia e ‘njerëzve toksikë’, vdes në moshën 117-vjeçare
E Enjte 22 Gusht 2024, 17:00
TiranaPost
Ajo u quajt personi më i vjetër në botë. María Branyas Morera festoi ditëlindjen e saj të 117-të në fillim të këtij viti me një tortë të vogël me qirinj dhe vlerësoi "qëndrimin larg njerëzve toksikë" ndër arsyet që e lejuan të jetonte kaq gjatë.
Branyas, një spanjolle me origjinë amerikane, vdiq në gjumë këtë javë, tha familja e saj në një postim në X. Pasi jetoi 117 vjet e 168 ditë, ajo ishte personi i tetë më i vjetër në histori, thanë Rekordet Botërore Guinness. Shkaku i vdekjes së saj nuk u bë publik; Guinness tha se përveç problemeve të dëgjimit dhe lëvizjes, ajo nuk kishte probleme të mëdha shëndetësore.
Familja e Branyas tha se ditët e fundit ajo fliste për ndjesinë e afërt me vdekjen dhe se do t'i mungonin gjërat e përditshme të tilla si pirja e kafesë, ngrënia e kosit dhe kafshët e saj shtëpiake.
Branyas ia atribuoi jetëgjatësinë e saj "fatit dhe gjenetikës së mirë", sipas Guinness. Ajo përmendi gjithashtu "rregullin, qetësinë, marrëdhënien e mirë me familjen dhe miqtë, kontaktin me natyrën, stabilitetin emocional, pa shqetësime, pa keqardhje, shumë pozitivitet dhe qëndrimin larg njerëzve toksikë".
E lindur në San Francisko më 4 mars 1907, Branyas jetoi gjithashtu në Teksas dhe Neë Orleans gjatë fëmijërisë përpara se të transferohej në Spanjë në moshën 7-vjeçare, duke jetuar për një kohë të shkurtër në Barcelonë dhe rajonin e Katalonjës.
Ajo jetoi dy Luftërat Botërore, Luftën Civile Spanjolle dhe dy pandemi - gripin dhe koronavirusin e vitit 1918. Ajo u infektua me Covid-19 në vitin 2020 në moshën 113 vjeç, por u shërua shpejt pasi pësoi simptoma të lehta, sipas Guinness.
Branyas "u nda nga jeta në mënyrë paqësore në shtëpinë e të moshuarve në Katalonjë, Spanjë, ku ajo banoi për dy dekadat e fundit", tha Guinness. “Përveç se kishte vështirësi për të dëgjuar dhe kishte probleme me lëvizjen, ajo nuk kishte probleme të tjera shëndetësore dhe mendja e saj ishte krejtësisht e kthjellët”.
Në vitin 1931, ajo u martua me Joan Moret, një mjek, i cili vdiq në vitin 1976. Ajo punoi së bashku me të shoqin për të trajtuar ushtarët e plagosur gjatë Luftës Civile Spanjolle dhe punoi si asistente e tij për disa vite më pas. Së bashku ata patën tre fëmijë, 11 nipër e mbesa dhe shumë stërnipër.
Branyas udhëtoi në Egjipt, Itali, Holandë dhe Mbretërinë e Bashkuar, i pëlqente të qepte, leximi dhe muzika. Në moshën 110-vjeçare, thuhet se ajo ende lexonte gazetën çdo ditë.
