Orët e terrorit për Roberto Baggio dhe familjen e tij. 5 hajdutë i marrin peng dhe vjedhin sendet me vlerë
E Premte 21 Qershor 2024, 09:54
TiranaPost
Ylli italian Roberto Baggio dhe familja e tij mbetën viktima të një grabitjeje të dhunshme mbrëmjen e së enjtes, teksa po ndiqnin ndeshjen Itali-Spanjë. Makthi për 57-vjeçarin filloi rreth orës 22:00 kur një bandë prej të paktën pesë personash, të gjithë të armatosur, hynë në vilën e futbollistit në Altavilla Vicentina.
Sapo grabitësit kanë hyrë në shtëpi, ai tentoi të përballej me njërin prej tyre: pas një përleshjeje shumë të shkurtër, grabitësi e ka goditur në kokë, duke i shkaktuar një plagë të thellë, më pas i mbyllën të gjithë në një dhomë. Ndërkohë, hajdutët kthyen përmbys çdo dhomë, duke vjedhur orë, bizhuteri dhe para.
Ende nuk është bërë një bilanc i dëmit material. Sapo hajdutët janë larguar, Baggio ka njoftuar Policinë dhe Ambulancën.
