'Rucking', tendenca më e fundit që duhet të provoni
E Enjte 29 Gusht 2024, 14:56
TiranaPost
Ecja mbetet një ushtrim i lehtë dhe popullor për shumë arsye – nuk keni nevojë për ndonjë pajisje specifike, bën mirë për shëndetin e zemrës, ju ndihmon të flini më mirë, të ndiheni më mirë dhe është një mënyrë e thjeshtë për të marrë dozën tuaj ditore të ajrit të pastër.
Ka shumë metoda që mund t'ju ndihmojnë t'i bëni shëtitjet tuaja tërheqëse dhe interesante. Kohët e fundit, një tendencë e re ka marrë vrull dhe ajo është 'rucking'.
'Rucking është thjesht ecja me peshën në trup ... peshën në shpinë, teknikisht,' tha Nichele Cihlar, drejtoresha e trajnimit në GORUCK.
Ashtu si ecja e rregullt, ‘rucking’ është një ushtrim i arritshëm. Gjithçka që duhet të bëni është të vendosni një çantë shpine me peshë dhe të filloni të lëvizni.
Është një stërvitje që bazohet pak a shumë në stërvitjen ushtarake. Ata bëjnë ecje dhe vrap, por gjithashtu duhet të mbajnë shumë pajisje të rënda me vete teksa ushtrohen, njësoj siç do duhej t`i mbanin në një luftë.
Për më tepër, ky ushtrim ofron disa shpërblime shtesë shëndetësore.
Rucking shton rezistencë në ecjen tuaj dhe gjithashtu ka një mori përfitimesh të tjera të fitnesit.
“Fizikisht, ecja është fantastike, por ndonjëherë ne duam ta përforcojmë, dhe mënyra e lehtë për ta bërë këtë është shtimi i peshës,” tha Cihlar. “Stërvitja e rezistencës është thelbësore, veçanërisht me kalimin e moshës, për të ndihmuar shëndetin e kockave dhe rritjen e muskujve, sepse kjo përkeqësohet natyrshëm ndërsa ne plakemi, duke filluar nga të 30-at.”
Rucking e çon ecjen tuaj nga një stërvitje kardio në stërvitje kardio plus rezistencë. Rekomandohet që të bëni 20 minuta stërvitje forcash dy herë në javë, por hulumtimet tregojnë se shumica e njerëzve nuk e arrijnë atë minimum.
Rucking është gjithashtu e mirë për qëndrueshmërinë kardiovaskulare.
Në mënyrë të veçantë do të ndihmojë me efikasitetin e zemrës duke pompuar më shumë gjak. Kjo mund të ndihmojë në uljen e presionit të gjakut dhe përmirësimin e rrahjeve të zemrës, kështu që është një fitore e favorshme.
Është gjithashtu i mirë për qëndrimin tuaj dhe forcën e shpinës. Ia vlen sidomos për ata që punojnë gjatë gjithë ditës ulur.
Plus, rucking ia vlen edhe për shëndetin tuaj mendor.
Sipas Mental Health America, dalja në natyrë lidhet me nivele më të ulëta të stresit dhe një humor më të mirë në përgjithësi.
Përveç kësaj, trupi prodhon vitaminë D kur ekspozohet ndaj dritës së diellit, e cila është e rëndësishme për shëndetin e kockave dhe madje mund të ndihmojë në frenimin e simptomave të depresionit dhe ankthit.
Fillimi i rucking nuk duhet të jetë i ndërlikuar dhe i vështirë.
Ajo që është e bukur është që ju mund të filloni me një çantë shpine që keni në dollapin tuaj dhe të futni disa revista në të, shishen tuaj të ujit.
Ju gjithashtu mund të merrni një çantë shpine me peshë, pajisje stërvitje e bërë enkas për këtë ushtrim.
Kjo pasi një çantë shpine e zakonshme mund të ulet shumë poshtë në shpinë, gjë që mund të shkaktojë probleme nëse mbani një çantë të rëndë. Nëse vendosni të zgjidhni një çantë shpine, thjesht sigurohuni që ajo të mos jetë shumë e varur.
Kur bëhet fjalë për peshën që dëshironi të mbani në shpinë, kjo varet nga niveli i forcës dhe peshës suaj. Mirë është të fillosh nga pak sepse gjithmonë mund të rritesh. Nëse e nis me peshë të rëndë mund të dekurajohesh që në fillim.
Nëse nuk jeni një ushtrues ose peshëngritës filloni me 2 kg e gjysmë deri në 5 kg. Për distancën, do të ishte ok të nisni me 1km.
