Policia e Shtetit reagon pas protestës: 3 efektivë janë në gjendje të rëndë, të shmangen thirrjet për dhunë
Wednesday 9 December 2020, 20:57
TiranaPost
Policia e Shtetit ka reagua për protestën e organizuar për vrasjen nga një efektiv të 25-vjeçarit Klodian Rasha, ku u shënuan dhe përplasje mes uniformave blu dhe protestuesve.
Në njoftimin për shtyp, Policia e Shtetit bën me dije se persona të dhunshmë kanë hedhur sende të forta në drejtim të forcave të rendit duke plagosur 9 prej tyre, 3 prej të cilëve ndodhen në gjendje më të rëndë në spital.
Protestuesit janë paralajmëruar se do të përballen me forcën ligjore ndërsa organizatorët, të cilët ende nuk dihet se kush janë, sipas policisë kanë bërë thirrje për protestën online. Të pyetur nga gazetarët, pjesmarrësit në protestë sot kanë thënë se nuk ka organizator mes tyre. Megjithatë duket se policia i ka identifikuara ata në rrjetet sociale megjithëse nuk jep detaje se cilët janë konkretisht.
Njoftim i Policisë së Shtetit
Tubimi i nisur pasditen e sotme para godinës së Ministrisë së Brendshme u përshkallëzua në veprime të dhunshme, duke thyer xhamat e Ministrisë së Brendshme dhe duke plagosur disa punonjës policie që ishin në shërbim, në ruajtje të institucionit.
Më pas, turma u drejtua në bulevardin “Dëshmorët e Kombit”, duke u përqendruar perpara Kryeministrisë. Ekstremistë të dhunshëm kanë hedhur sende të forta, gurë, pllaka, kapsolla e sende të tjera, duke plagosur 9 punonjës policie dhe duke shkaktuar dëme të mëdha materiale në bulevardin “Dëshmorët e Kombit” dhe në Sheshin Skënderbej.
Si pasojë e plagëve të marra, 3 punonjës policie janë në gjendje më të rëndë në spital, pasi kanë dëmtime serioze në kokë dhe në trup, të shkaktuara nga sulmi me sende të forta nga protestuesit, ndërsa 6 punonjës policie janë në gjendje më të stabilizuar. Edhe disa mjete policore u dëmtuan me sende të forta.
Policia e Shtetit bëri të gjitha përpjekjet për menaxhimin me shumë përmbajtje të dhunës së papritur dhe të padrejtë ndaj punonjësve të saj dhe ndaj institucioneve.
Policia e Shtetit apelon për të gjithë protestuesit që të mos ushtrojnë dhunë ndaj punonjësve të Policisë dhe institucioneve, pasi cilido do të përballet me pasojat ligjore.
Policia e Shtetit iu bën thirrje organizatorëve, të cilët kanë bërë thirrje sot në rrjetet sociale për t’u grumbulluar në protestë, të marrin masa të menjëhershme për të ndaluar thirrjet për dhunë, pasi dhuna do të përballet me përgjigjen ligjore të Policisë së Shtetit.
Episodi i papranueshëm i vrasjes së një qytetari nga një punonjes policie, i cili po hetohet në gjendje arresti, nuk mund të përdoret si pretekst për të ushtruar dhunë të verbër, për të plagosur rëndë punonjësit e Policisë së Shtetit dhe shkatërruar pronën publike dhe private.
