Pse nuk dua të shkoj në pushime me shoqet që kanë fëmijë
Tuesday 24 March 2026, 14:15
TiranaPost
Një grua ka ndezur një debat të fortë në Reddit pasi pyeti përdoruesit nëse kishte gabuar që refuzoi një ftesë për pushime me shoqet e saj të vjetra. Ajo pranoi se nuk donte të kalonte një fundjavë të gjatë duke folur vetëm për “martesa dhe fëmijë”.
Gruaja tregoi se ka një grup prej tetë shoqesh, me të cilat është miqësuar prej më shumë se një dekade, që nga koha e shkollës. Edhe pse sot jetojnë në vende të ndryshme, ato takohen disa herë në vit për një fundjavë së bashku. Ajo theksoi se është e kënaqur me jetën e saj aktuale: është beqare, po njeh dikë dhe nuk është e sigurt nëse dëshiron të ketë fëmijë. Nga ana tjetër, shumica e shoqeve të saj janë të martuara ose në marrëdhënie afatgjata dhe disa prej tyre kanë fëmijë ose janë në pritje.
Ajo refuzoi të marrë pjesë në udhëtimin e këtij viti, duke thënë se ishte shumë shpenzim për “tre ditë ku flitet vetëm për fejesa, martesa apo fëmijë”. Sipas saj, shoqet nuk tregojnë interes për jetën e saj, përveç rasteve kur ajo flet për dikë me të cilin po del. Madje, në një takim të fundit, ajo u detyrua të dëgjonte për më shumë se një orë një shoqe që fliste për planet e saj të ushqyerjes me gji, ndonëse nuk ishte as shtatzënë.
Ajo shtoi se këto takime jo vetëm që janë të mërzitshme për të, por edhe e bëjnë të ndihet keq me veten, për më tepër duke qenë edhe të kushtueshme. Megjithatë, ajo u shpreh se është e lumtur për zgjedhjet e shoqeve të saj, por mendon se ky nuk është momenti i duhur për të marrë pjesë në këtë lloj fundjave.
Shpjegimi i saj ka lënduar një nga shoqet, ndërsa disa e kanë akuzuar se nuk është e interesuar për jetën e tyre. Ajo u mbrojt duke thënë se ka marrë pjesë në evente të rëndësishme si dasma apo baby shower, por këto angazhime janë edhe emocionalisht, edhe financiarisht të kushtueshme.
Ajo theksoi gjithashtu mungesën e reciprocitetit në miqësi, duke treguar se kur ftoi shoqet në ditëlindjen e saj, ato refuzuan për shkak të angazhimeve me punën apo partnerët.
Shumë përdorues në Reddit i dhanë të drejtë, duke theksuar se problemi nuk është tema e bisedave, por fakti që marrëdhënia është bërë njëanshme dhe pa interes të ndërsjellë. Sipas tyre, mungesa e reciprocitetit tregon se miqësia nuk është më e balancuar dhe se ajo po jep më shumë sesa merr.
