Ukraina dhe Rusia hartojnë planin paraprak të paqes për t'i dhënë fund luftës
Wednesday 16 March 2022, 17:11
TiranaPost
Ukraina dhe Rusia kanë bërë "përparime të rëndësishme duke hartuar një plan të përkohshëm paqeje prej 15 pikash" që përfshin armëpushim dhe tërheqjen e forcave ruse nëse Kievi bie dakord për statusin neutral dhe pranon kufizimet për forcat e tij të armatosura, thuhet në një raport të Financial Times.
Gazeta citon tre persona të përfshirë në bisedime që thonë se marrëveshja e propozuar, të cilën negociatorët ukrainas dhe rusë e diskutuan plotësisht për herë të parë dje, përfshin heqjen dorë nga ambiciet e Ukrainës për t'u bashkuar me NATO-n dhe premtimin se nuk do të presë baza të huaja ushtarake ose armatimin për mbrojtje nga aleatët si SHBA, Britania e Madhe dhe Turqia.
Megjithatë, sipas gazetës detajet e garancive perëndimore për sigurinë ukrainase – dhe sa të pranueshme mund të jenë ato për Kremlinin – “mund të jenë ende një pengesë e madhe për çdo marrëveshje".
Sipas raportit, zyrtarët ukrainas mbeten skeptikë se Presidenti rus Vladimir Putin është plotësisht i përkushtuar ndaj paqes dhe ekziston frika se Moska mund të dojë të fitojë kohë për të rigrupuar forcat e saj dhe për të rifilluar fuqishëm sulmet.
SHBA ka thënë gjithashtu se çdo sukses në bisedimet e paqes kërkon fillimisht që Moska të tregojë "vullnet të mirë" në terren, gjë për të cilën nuk ka ende prova.
