"Me shumë pak para, ishte elegante. Dhe shpesh vishte diçka burrash", tha njëherë Armani për nënën e tij.
Për të kuptuar thelbin e Giorgio Armanit, origjinën e stilit të tij të pastër dhe rrënjën e neverisë së tij ndaj vulgaritetit, nuk duhet parë tek pasarelat e Milanos apo tapetet e kuq të Hollivudit. Duhet të kthehesh në Piacenza, në vitet e luftës dhe të shohësh një grua. Ajo quhej Maria Raimondi, nëna e tij. Ajo ishte muza e parë, e pavetëdijshme, kodi i vërtetë gjenetik i perandorisë Armani.
"Me shumë pak para, mamaja ime ishte jashtëzakonisht elegante", ka treguar shpesh stilisti. "Ajo më mësoi shumë gjëra, mes tyre thjeshtësinë dhe rreptësinë e elegancës: vetëm atë që është e nevojshme për ta bërë diçka të bukur dhe asgjë më tepër." Ky mësim, i përvetësuar në fëmijëri, u bë shtylla e filozofisë së tij estetike dhe sipërmarrëse. Në jahtin e tij, ai mbante një foto bardhezi ku shihej fëmijë në një plazh, pranë kësaj "bukuroshes me sy të errët", e veshur me një fund dhe shumë stil.
