Në vitin 2026, kompanitë e mëdha të teknologjisë dhe markat e modës po mbledhin shumë të dhëna për njerëzit. Ato duan të dinë çfarë blejmë, çfarë na pëlqen dhe si sillemi online, që të na japin reklama dhe sugjerime sa më të personalizuara.
Kjo ndodh sepse Inteligjenca Artificiale (AI) funksionon më mirë kur ka shumë të dhëna. Sa më shumë di për një person, aq më “të sakta” mund të jenë rekomandimet apo reklamat.
Por problemi është se shumë njerëz po fillojnë të mos ndihen rehat me këtë. Ata mendojnë se po japin shumë informacione personale dhe nuk marrin gjithmonë diçka të vlefshme në këmbim. Sipas disa studimeve, vetëm një pjesë e vogël e njerëzve u beson vërtet rekomandimeve të AI-së.
Ekspertët thonë se konsumatorët, sidomos ata më të pasur dhe më të informuar, po bëhen gjithnjë e më të vetëdijshëm për mënyrën se si përdoren të dhënat e tyre personale. Kjo po i shtyn ata të refuzojnë reklamat e targetuara, mbledhjen e të dhënave dhe madje të paguajnë për platforma më private dhe të koduara.
Privatësia si status luksi
Platformat sociale si YouTube, Instagram, Snapchat dhe Facebook kanë nisur të ofrojnë versione me pagesë pa reklama, duke synuar përdoruesit që duan më shumë privatësi. Ndërkohë, platforma të reja si Vero dhe Mewe janë ndërtuar që në fillim mbi modelin “pa reklama dhe pa mbledhje agresive të të dhënave”.
Sipas ekspertëve, privatësia po shndërrohet në një simbol të ri statusi, sidomos për konsumatorët e rinj dhe të pasur.
“Nëse nuk paguan me para, po paguan me të dhënat e tua,” tha Patricia Egger, drejtuese e sigurisë në Proton, kompania e njohur për shërbimet e emailit të koduar.
