Studimi zbulon “sekretin” e gruas spanjolle që jetoi 117 vjet
Sunday 28 September 2025, 10:30
TiranaPost
Një studim i publikuar në Cell Reports Medicine ka zbuluar faktorët që e ndihmuan Maria Branyas Morera – gruan spanjolle e lindur në SHBA dhe personin më të moshuar në botë deri në vdekjen e saj në gusht 2024 – të arrinte moshën rekord prej 117 vitesh e 168 ditësh.
Ekipi i udhëhequr nga Dr. Manel Esteller në Barcelonë analizoi gjakun, pështymën, urinën dhe mikrobiomën e saj, duke e krahasuar me atë të 75 grave të tjera nga gadishulli Iberik. Rezultati? Një përzierje e rrallë mes “lotarisë gjenetike” dhe një jete të shëndetshme mesdhetare.
Sekretet e saj të përditshme:
Nuk konsumonte alkool apo duhan
Ndiqte një dietë të pasur me vaj ulliri
Hante deri në 3 porcione kos në ditë
Jetonte në fshat dhe ecte rregullisht rreth një orë në ditë
Shkencëtarët theksojnë se zakone të tilla i ruajtën një mikrobiomë të zorrëve po aq të shëndetshme sa një person i ri, duke ndihmuar në uljen e inflamacionit dhe plakjes.
Nga ana tjetër, gjenet e saj mbronin funksionin imunitar, kujtesën, metabolizmin dhe shëndetin e trurit e të zemrës. Megjithatë, ekspertët paralajmërojnë: nuk ka një “recetë magjike” për jetëgjatësinë, pasi çdo trup plaket ndryshe.
Ky studim shihet si një nga më të plotët deri tani dhe pritet të hapë rrugë për kërkime të reja mbi sekretet biologjike të superqindvjeçarëve.
