Johnny Depp-it i vidhen të dhënat e kartës, transaksione mbi 520 mijë paund
Thursday 28 May 2026, 15:00
TiranaPost
Johnny Depp, raportohet se ka qenë viktimë e një skeme të madhe mashtrimi financiar, pasi të dhënat e kartës së tij American Express dyshohet se janë përdorur për transaksione të paligjshme me vlerë mbi 520 mijë paund.
Sipas raportimeve, policia hungareze ka arrestuar një 27-vjeçar në Budapest gjatë një operacioni të zhvilluar më 6 maj. Në pamjet e publikuara, efektivë të armatosur dhe me pajisje speciale shihen teksa hyjnë në apartamentin e të dyshuarit dhe e vënë në pranga.
Hetuesit dyshojnë se i riu kishte siguruar të dhënat bankare të aktorit përmes blerjeve online dhe rezervimeve në platforma interneti. Transaksionet e dyshimta besohet se janë kryer nga janari 2024 deri në dhjetor 2025.
Autoritetet thanë se alarmi u dha nga një bankë amerikane, e cila konstatoi lëvizje të pazakonta financiare dhe njoftoi degën hungareze të FBI-së. Pas hetimeve, gjurmët çuan në një apartament me qira në Budapest.
Megjithëse i arrestuari mohon akuzat, gjykata ka urdhëruar paraburgimin e tij. Hetuesit po analizojnë mbi 300 transaksione, me një vlerë totale që kalon 536 mijë paund.
Rasti ka rikthyer në vëmendje edhe qëndrimin e Depp në Hungari gjatë xhirimeve të filmit “Modì, Three Days on the Wing of Madness”, projekt që ai e drejtoi vetë dhe ku luanin Al Pacino dhe Stephen Graham.
Ndërkohë, ylli i “Pirates of the Caribbean” pritet të rikthehet në një prodhim amerikan për herë të parë që prej vitit 2020, me filmin e ri “Ebenezer: A Christmas Carol”, ku do të luajë përkrah Daisy Ridley dhe Sam Claflin.
