Antonio Guterres: OKB në rrezik kolapsi financiar
Saturday 31 January 2026, 10:37
TiranaPost
Sekretari i Përgjithshëm i OKB-së, Antonio Guterres, ka paralajmëruar se organizata po përballet me një krizë të rëndë financiare, e cila rrezikon ta çojë drejt kolapsit. Në një letër drejtuar vendeve anëtare, ai theksoi se situata aktuale është shumë më serioze se vështirësitë e mëparshme ekonomike.
Shkaku kryesor lidhet me mospagesën e kontributeve nga disa shtete, të cilat nuk kanë përmbushur detyrimet e tyre financiare ndaj buxhetit të OKB-së. Në mënyrë të veçantë përmenden Shtetet e Bashkuara, që muajt e fundit kanë vonuar pagesat ose kanë reduktuar fondet për programe të caktuara ndërkombëtare. Administrata amerikane ka njoftuar gjithashtu tërheqjen nga dhjetëra organizata ndërkombëtare, përfshirë disa struktura të lidhura me OKB-në.
Sipas të dhënave zyrtare, megjithëse mbi 150 nga 193 shtete anëtare kanë paguar kuotat e tyre, OKB-ja e mbylli vitin 2025 me një deficit prej rreth 1.6 miliardë dollarësh, më shumë se dyfishi i vitit paraardhës. Guterres paralajmëron se mungesa e likuiditetit mund ta detyrojë organizatën të ngrijë punësimet, të shtyjë pagesat dhe të shkurtojë shërbimet.
Ai thekson se nëse situata nuk përmirësohet, buxheti i rregullt i OKB-së rrezikon të mbetet pa fonde që në korrik të këtij viti. Për këtë arsye, Guterres u ka bërë thirrje vendeve anëtare të paguajnë menjëherë detyrimet e tyre, përndryshe do të nevojitet një rishikim i thellë i sistemit financiar të organizatës.
Buxheti i miratuar për vitin 2026 është 3.4 miliardë dollarë, rreth 7 për qind më i ulët se një vit më parë, ndërsa janë shkurtuar edhe rreth 2400 vende pune. Aktualisht, SHBA mbetet kontribuesi kryesor i OKB-së me rreth 22 për qind të financimit, e ndjekur nga Kina me rreth 20 për qind.
