Majlinda Ikonomi: Si m`u desh të diagnostikoja shoqen me të cilën bashkë sensibilizonim kundër kancerit
Kjo është historia e saj...
E Enjte 5 Shkurt 2026, 13:26
TiranaPost
Majlinda Ikonomi
Nga Dr. Majlinda Ikonomi/ Sonela ishte mjeke – epidemiologe – dhe mikja ime që nga fëmijëria. Profesioni ynë i përbashkët dhe përkushtimi ndaj shëndetit u shndërruan natyrshëm në një miqësi të thellë, të ndërtuar mbi vlera, besim dhe një ndjenjë të përbashkët misioni.
Gjatë një aktiviteti timin për ndërgjegjësimin mbi kancerin e gjirit, më lindi ideja që preparatet patologjike – tumoret hormon-pozitive, sëmundjet HER2-pozitive, rastet me regresion patologjik pas terapisë neoadjuvante – t’i ktheja në vepra vizuale arti. Qëllimi ishte që këto imazhe të vendoseshin në spitale, salla leksionesh dhe hapësira publike, duke e shndërruar të dhënën shkencore në diçka njerëzore, të dukshme dhe reflektuese.
Për të përfshirë të rinjtë, propozova që vajzat tona të bëheshin pjesë e këtij projekti. Të dyja ndiqnin shkollë pikture. Vajza ime zgjodhi të pikturonte veshje moderne dhe forma bashkëkohore. Vajza e Sonelës zgjodhi diçka tjetër – ajo zgjodhi të pikturonte vetë jetën.
Ato piktura dhe krijime u realizuan nga vajza e saj.
Më vonë, Sonela – mikja ime, kolegia ime – u diagnostikua me kancer gjiri në stadin IV.
U trondita thellësisht. Isha unë ajo që po diagnostikoja kancerin e saj dhe ndjeva një përfshirje emocionale të jashtëzakonshme – pothuajse faj – duke kujtuar se ajo kishte qenë pa e ditur pjesë e atyre historive shumë kohë përpara diagnozës së saj. Vajza e saj kishte pikturuar, në ato imazhe, sëmundjen që do të bëhej realiteti i nënës së saj.
Edhe sot, kur mendoj për Sonelën – nga larg – e ndiej këtë histori sa të dhimbshme, aq edhe të bukur, prej përkushtimi dhe kontributi. Është unike. Ajo që ajo dhe vajza e saj bënë së bashku përfaqëson unitetin e luftës për diçka që një ditë mund të bëhet beteja jote personale.
Kjo është trashëgimia e tyre.
Në kujtim të saj
Tiranapost.al
